04 марта 2015 г.
Пушар – пысăк инкек, вăл çынсене, çуртсене, пурлăха, чĕрчунсене, вăрмансене тĕп тăвать
2014 çулта районта 45 пушар пулнă. Вĕсенче пилĕк çын вилнĕ, вуннăн аманнă. Инкексен тĕп сăлавĕ – хутса ăшăтмалли кăмакасем юсавсăр пулни, йăлари электроприборсемпе усă курнă чухне правилăсене пăсни, хăйсем ăсталанă обогревательсемпе усă курни, вут-çулăмпа тимсĕр пулни, ачасем шăрпăкпа выляни, юриех чĕртсе яни.
Иртнĕ çулталăк хурлăхлă хыпартан пуçланчĕ тесен те йăнăш мар – январĕн 2-мĕшĕнче Анаткас Хапăсра электроприборпа тĕрĕс мар усă курнăран пушарта икĕ çын пурнăçĕ татăлчĕ. Январĕн 20-мĕшĕнче Хирпуçĕнче кăмакапа усă курнă чухне пушар хăрушсăрлăх правилисене пăсни ватă хĕрарăма пурнăç хакне тăнă. Февралĕн 3-мĕшĕнче Вăрнарта Тракторнăй тăкăрлăкра ÿсĕрле чĕлĕм туртнăран пÿлĕме вут хыпса илнĕ, кил хуçи тĕтĕмпе наркăмăшланнă.
Кăçалхи çул та пушарсем тĕлĕшпе лару-тăру çивĕч. Икĕ уйăхра районта 10 хутчен вут-çулăм тухнă, вĕсенче икĕ çын вилнĕ, виççĕн аманнă.
Пушарсене асăрхаттарас тата хăрушсăрлăхпа тивĕçтерес тĕллевпе районта сахал мар ĕç пурнăçланать. Кашни поселенирех обществăлла комиссисем йĕркеленĕ, ун йышне поселени ĕçченĕсемсĕр пуçне депутатсем, пушар хуралĕн службин сотрудникĕсем, полицин участокри уполномоченнăйĕсем тата ахаль çынсем кĕреççĕ. Вĕсем тĕрлĕ профилактика мероприятийĕсем йĕркелеççĕ. 11 пин ытла уйрăм çурта, пĕччен пурăнакан 850 çынна, ăнăçсăр 349 çемьене, нумай ачаллă 584 çемьене тĕрĕсленĕ, 18 пине яхăн çынна пушар хăрушсăрлăхĕ пирки инструкци панă, 27 пин ытла памятка валеçнĕ.
Пушарсем уйрăм çуртра ытларах тухнăран вĕсене пысăк тимлĕхе илнĕ, вĕсенче электроустановкăсемпе, газ оборудованийĕпе епле усă курнине, килте тата мунчара кăмакасемпе тĕтĕм çулĕсен юсавлăхне, çуртсене епле хутса ăшăтнине тĕрĕслесси çирĕп асăрхавра.
Паллах, тĕп вырăнта – пушар хăрушсăрлăх правилисене пăхăнни, ку пурнăçа, сывлăха, пурлăха сыхласа хăварниех.
Çавăнпа та çулăм тăшман пулса ан тăтăр тесен тимлĕхе çухатмалла мар.
Ф.ТИМОФЕЕВ,
район администрацийĕн ятарлă программăсен
пайĕн пуçлăхĕ.