04 марта 2015 г.
Шалти ĕçсен республикăри министерстви пуçарнипе Çĕршыв хÿтĕлевçин кунĕ умĕн çарпа патриотизм юррин 18-мĕш фестивалĕ иртнĕ. Çулсеренех ку конкурса хутшăнакансен йышĕ пысăкрах та пысăкрах. Çакă йĕрке хуралĕнче чăннипех те талантлă, пултаруллă çынсем тăнине çирĕплетет. Пурнăçа кăткăс службăпа çыхăнтарнă пулин те, илемре, юрă-кĕвĕре вĕсем чун киленĕçне тупма пĕлеççĕ.
Кăçал та фестивалĕн вырăнти тапхăрĕсене полици сотрудникĕсем тата вĕсен çывăх çыннисем 35-ĕн хутшăннă. Пултарулăх ăмăртăвĕн кăтартăвĕсене уяв умĕн пĕтĕмлетнĕ, çĕнтерÿçĕсен ячĕсем паллă. Вĕсене пурне те «Победа» мемориал комплексĕнче иртнĕ гала-концерта уяв сцени çинчен хăйсен ăсталăхĕпе паллаштарма чĕннĕ. Фестиваль çĕнтерÿçисемпе пĕрлех полицин паянхи ĕçченĕсене тата хисеплĕ ветеранĕсене çĕршыв хÿтĕлевçин кунĕ ячĕпе Шалти ĕçсен республикăри министрĕ Сергей Семенов тата ЧР шалти ĕçсен органĕсен ветеранĕсен канашĕн председателĕ Михаил Киселев саламланă.
Республика фестивалĕн гала-концертне хутшăннă лауреатсен йышĕнче пирĕн ентеш те пур. Конкурсăн «Юрлас ăсталăх» номинацийĕнче хĕрсен ушкăнĕнче 2-мĕш степеньлĕ диплома «Вурнарский» пайăн çула çитменнисен ĕçĕсемпе тимлекен инспекторĕ полици лейтенанчĕ Наталия Васильева çĕнсе илнĕ. Наталия – çамрăк сотрудник. Районти полици пайĕнче нумаях ĕçлемест пулин те, хăйне лайăх енчен кăтартма ĕлкĕрнĕ. Аслă юлташĕсенчен тĕслĕх илсе тата вĕренсе пырса службăра та çитĕнÿсем тăвать. Спортпа туслăскер, ăмăртусенче яланах чи хастаррисен йышĕнче. Юрра-ташша вара ачаранпах ăста.
Сăмах май, фестиваль гала-концертĕнче Наталияпа пĕрле сцена çине хăй вĕреннĕ Калининăри шкулти кадет класĕ те пĕрле тухнă. Илемлĕ юрă çеммипе вĕсем куракансене вальс ташши парнеленĕ.
И.ЯКОВЛЕВА.