28 февраля 2015 г.
.jpg "Кавир çинче – кĕçĕннисем")
Вăрнар районĕнче спортра пысăк шанăç паракан çамрăксем сахал мар. Ирĕклĕ майпа кĕрешекенсем акă уйрăмах тĕрлĕ шайри турнирсене çине-çинех çĕнеççĕ.
Аслăрах ÿсĕмри кĕрешÿçĕсен çитĕнĕвĕсене вулакансем аван пĕлеççĕ. Халĕ, республикăри черетлĕ турнир хыççăн, кĕçĕннисене те мухтав сăмахĕсем каламалла.
Шупашкарта иртнĕ республикăн уçă первенствине районти шкулсенче вĕренекен 13 ача хутшăннă. Чăваш Республикин тава тивĕçлĕ тренерĕ Виталий Трофимов палăртнă тăрăх, кусем, кĕрешÿре чăнласах тăтăш пиçĕхсен, Раççей ăмăртăвĕсен пьедесталĕсем çине хăпарма тивĕç пулакан ачасем. Денис Иванов, Алексей Антонов, Никита Никандров, Никита Фадеев, Вячеслав Степанов, Андрей Степанов, Илья Сидоров, Егор Савельев, Егор Воронцов, Илья Алексеев ку хутĕнче çĕнтерÿçĕсен йышне лекеймен пулин те кавир çинче хитре тытăçупа палăрнă.
Санарпуç шкулĕнче вĕренекен Антон Федоров вара чи лайăх техникăшăн Хисеп грамотине тивĕçнĕ. Унсăр пуçне, хăйĕн виçе категорийĕнче вăл ылтăн медаль çĕнсе илнĕ.
Александр Васильевпа Алексей Тимофеев турниртан бронза медальсемпе таврăннă.
Пьедестал çине тăма чыса тивĕçме çăмăлах пулман. Кашни виçе категорийĕнче кавир çине 30-ăн ытла тухнă.
Вăрнар районĕн тепĕр пултаруллă кĕрешÿçисем – Настя Максимова, Лена Ластухина, Катя Кошкина – çак кунсенче Шупашкарта вĕрентÿллĕ сборта ăсталăха туптаççĕ. Мартăн 9-мĕшĕнче вĕсен Пĕтĕм Раççейри турнира хутшăнма тивет.