28 февраля 2015 г.
Ярмушка ял тăрăхĕнче «Гвардеец» спорт организацийĕ йĕркеленипе Хĕрлĕ Çăлтăр орден кавалерне, Тăван çĕршывăн Аслă вăрçин участникне Артем Яковлевич Яковлева халалласа «Йĕлтĕр йĕрĕ–2015» ăмăрту иртрĕ. Кÿршĕ ялсенчи, районсенчи, Шупашкарта тата Мускав хулинче пурăнакан спортсменсем хутшăнчĕç унта. Çак кун йĕлтĕр çине вунă çултан пуçласа ултă теçеткерен иртнисем те хаваспах тăчĕç.
Пĕтĕмпе 110-ăн старта тухрĕç. 14 çула çитмен хĕрачасен ушкăнĕнче 1-мĕш вырăна Хапăсри Анастасия Тикинева çĕнсе илчĕ.
Ытти ÿсĕмсенчи чемпионсем – Ярмушкари вăтам шкулта вĕренекен Кристина Михайлова, Хапăсри Владимир Скворцов, Даниил Анисимов, Вăрнарти Александр Романов, Ярмушкари Василий Иванов, Комсомольски районĕнчи З.Тимаев, Шупашкарти Валерий Матвеев, Вăрнарти Георгий Никишов. Вениамин Федоров пурне те пыл сĕрнĕ Çăварни икерчипе хăналарĕ. Çакăн пек мероприятисем йĕркелесе ирттерекенсене, ачасене пĕчĕкренех спорта явăçтарма пулăшакансене ашшĕ-амăшĕ, ял-халăхĕ тав сăмахĕсем каларĕç.
Л.ГРИГОРЬЕВА.