28 февраля 2015 г.
Кукăр алăллă çын ăçтан мĕн çаклатса тухмаллине яланах шыраса тупать. Тĕрĕс мар выртаканнине те, хăй вырăнĕнче йĕркеллĕ тăракан япалана та – нимĕн те тиркемест.
Кульцав ялĕнче акă 31-ри И.Пынзарь пĕр хуçалăхранах темиçе хутчен металл япаласем йăкăртнă. Пĕрре çапла каçхине урампа пынă чухне вăл ют пахчари алюмини пичкене курах кайнă. Тепри пулсан чарăнса тăмасăрах иртсе каять, анчах çак арçыннăн пуçне тÿрех ăна вăрласа тухса сутас шухăш пырса кĕнĕ. Питĕрмен алăкран çăмăллăнах кĕнĕ вăл, хуçисем мунча çумне металл юпасем çине тăратнă пичкене тĕксе антарнă та килнелле сĕтĕрсе кайнă. «Алюмини хуран та пурччĕ-ха унта,тата çавна илме таврăнмалла», – хăйпе хăй калаçса пынă вăл каçхи урампа утнă май. Анчах килне çитнĕ çĕре ывăннăран-ши е ÿркеннĕрен-ши «вăрттăн» ĕçе урăх тухман. Вăрланă пичкене тепĕр кунне касса вакланă та сарайĕнче пытарса хунă.
Апла пулин те ют пахчара юлнă алюмини япаласем ăна пурпĕрех канăç паман. Эрне иртсен, çурçĕр тĕлĕнче, таврăннă вăл унта. Ку хутĕнче те «тупăш» сахалах пулман: чукун хуран тата икĕ алюмини пичке. Икĕ каçра И.Пынзарь кил хуçине 19 пин тенкĕ енне тăкак кÿнĕ. Метала арçын Вăрнара, тĕслĕ металл пухакансене, килсе панă.
И.Пынзарь тĕлĕшпе пуçарнă уголовлă ĕçе пăхса тухнă май, Вăрнар район сучĕ ăна 10 пин тенкĕ штраф хума йышăннă.
В.ЯКОВЛЕВ,
Раççей ШĔМ-ĕн «Вурнарский» пайĕн следстви уйрăмĕн пуçлăхĕ.