25 февраля 2015 г.
Мăн Явăшри вăтам шкулти кăçалхи парад кадетсен ушкăнне чăмăртарĕ, ку рете 7-мĕш класри 15 ачана йышăнчĕç. Вĕсем лайăх вĕренеççĕ, хăйсене мĕнпур ĕçре хастар кăтартаççĕ. Сывлăхлă. Маттур. Спортпа туслă. Уяври строя капашсăр капăр формăпа тăчĕç. Уявра Эрик Васильевич Васильев полковник (халь вăл Мускаври Пĕрремĕш кадет корпусĕн штатри офицерĕ) мăн-явăшсен çак класне Мускаври филиал шучĕпе йышăнатпăр тесе пĕлтерчĕ.
Сăмах майăн кăштах çак корпус пирки те каласа хăварар. Патшалăхăн Мускаври Пĕрремĕш кадет корпусне РФ Президенчĕ 1997 çулхи апрелĕн 9-мĕшĕнче йышăннипе йĕркеленĕ. Тĕллевĕ – çул çитменнисене Тăван Çĕршыв службине професси тĕлĕшĕнчен хатĕрлесси. Мускаври корпуса 5-6-7-мĕш классене йышăнаççĕ. Профилĕ – аэрокосмос. Çар ĕçне пуçламăш классенчен хатĕрленмелле. Корпус çамрăк çынна мĕнпур енлĕ вăйлă аталану кÿрет. Центрта – вĕренÿ корпусĕ, пурăнмалли корпус, медицина блокĕ, хуçалăх корпусĕ, спортзал, шыва кĕмелли бассейн, спортплощадкăсем, хăнасене кĕтсе илмелли вырăнсем...
Раççейре кадет корпусĕсем туса хурасси Пĕрремĕш Петĕр патшан реформисемпе çыхăннă. Пирвайхине 1731 çулта Санкт-Петербургра йĕркеленĕ. 1794 – 1797 çулсенче унăн директорĕнче Михаил Илларионович Кутузов ларнă. 1919 çул тĕлне Раççейре 31 кадет корпусĕ ĕçленĕ. Кадетсен йышĕнче эпир пурте пĕлекен паллă çынсем нумай: П.А. Румянцев фельдмаршал, А.А.Брусилов генерал, Ф.Ф.Ушаков, П.С.Нахимов адмиралсем, писательсем – А.Н.Радищев, В.И.Даль, А.И.Куприн, Ф.М.Достоевский, поэтсем – Ф.И.Тютчев, С.Г.Надсон, композиторсем – Н.А.Римский-Корсаков, С.В.Рахманинов, А.Н.Скрябин, вырăс театрĕн никĕслевçи Ф.Г.Волков... Кадетсен корпусне «Наци Мухтавĕн Ылтăн çăлтăрĕ» орденпа, Александр Невский орденĕпе, «ХХ ĕмĕр меценачĕсем» ылтăн медальпе наградăланă, нацин Ылтăн Кĕнекине кĕртнĕ.
Мăн Явăшри парадăн смотр-конкурсĕнче пĕтĕмĕшпе шăпах 7-мĕш класс çĕнтерчĕ: пулас кадетсем вирлĕ хатĕрленнĕ. Стройри ăсталăхпа 5-мĕш класс, çар формипе 3-мĕшсем, юрăпа 7-мĕшсем мала тухрĕç. Чи пултаруллă командирсем Алина Краснова (1-мĕш вырăн), Таня Иванова (2-мĕш), Анюта Миронова (3-мĕш). Смотрта палăрнисем икĕ шкулĕнче те пурте Э.В.Васильев парнисене тивĕçлĕ пулчĕç, çав шутра волейбол мечĕкĕсем, пуçа, çие, урана тăхăнмаллисем, уяв кĕрекин астивмелĕх кучченеçĕ...
Кадетсен районти черетлĕ класĕ Кĕçĕн Кипекри вăтам шкулта пулать – ку ыйтупа калаçса татăлнă.
М.ВАСИЛЬЕВ.