25 февраля 2015 г.
Тăван Çĕршыва хÿтĕлекенсен кунне пилленĕ мероприятисем хальхинче Аслă Çĕнтерĕвĕн çывăх вăхăтри 70 çуллă юбилейĕпе таччăн çыхăнни çак уявсен пĕлтерĕшне палăрмаллах пысăклатрĕ.
Иртнĕ эрнекунпа шăматкун манăн пĕр-икĕ шкулта пулма тÿр килчĕ. Ытти çулсенче те курнă, ĕнентерсех каласшăн: иккĕшĕнче те патриотсем пăхса ÿстересшĕн – ку енлĕ воспитание вĕрентÿпе пĕрлех тĕпре тытаççĕ. Кĕçĕн Кипекри вăтам шкулти Николай Дмитриевич Павлов физкультурăпа спорт учителĕ кăна мар, хăйне чăнласа çар ĕçĕн ертÿçи вырăнне хурать. Февралĕн 23-мĕшĕ ячĕпе парад хатĕрленĕ, çарти стройăн мĕнпур тĕслĕхĕсене кăтартма смотр ирттерчĕç. Унта 2-мĕш класрисенчен пуçласа 11-мĕшĕнчисем таран пурте хутшăнчĕç. Жюри хаклама формăна («моряксем» е «пограничниксем» пĕр евĕрлĕ çыпăçуллă тумланнине), дисциплинăна, отряд командирĕн çаврăнăçулăхне, стройпа пĕр тикĕс утма, командăсене тĕп-тĕрĕс пурнăçлама пĕлнине, стройри юрра хитре шăрантарнине тата ыттине питĕ тимлĕ пăхаççĕ.
Музыка янăрать. Классем хăйсен вырăнне йышăнаççĕ. Командирĕсем рапорт параççĕ. Çĕнтерÿ ялавĕ, унăн икĕ енĕпе РФпе ЧР ялавĕсем. Раççей гимнĕ кĕрлет. Парада унăн ертÿçинчен Н.Павловран çулленхиллех Мускав хăни Э.В.Васильев полковник йышăнать...
Праçнике хутшăннисене шкул директорĕ Аделина Михайловна Степанова саламларĕ. Ветерансене сăмах пачĕç. Хĕрлĕ Çарпа Совет Çарĕн тата Раççей Çарĕн, тĕрлĕ тапхăрсенчи флотсен кун-çулне кăтартма витĕмлĕ литмонтаж хатĕрленĕ. Патриотлăх урокĕсене учительсем Совет халăхĕн Çĕнтерÿ кунне çитсе тухнă асаплă та сăваплă çул-йĕрĕпе çыхăнтарнă. Хальхи мероприятире Любовь Сергеевна Павлова, Ираида Ивановна Алексеева тĕллĕн хастар пулнине палăртса хăварас килет. Смотр конкурсĕнче ачасенчен 2-мĕш класс командирĕ Саша Медведев хытă тĕлĕнтерчĕ. «Лара-тăра пĕлменнисем» (2, 3, 6-мĕш классем), «усурниксем» (9–10-мĕш классем) шÿтлĕ бал ташшисемпе савăнтарчĕç. Çар тумтирĕпе чи паллăраххисем тесе 10-мĕш класрисене хавхалантарчĕç. Стройри юрăпа 8-мĕшĕнчисем мала тухрĕç. Пĕтĕмĕшле итогсен çĕнтерÿçи – 11-мĕш класс.
М.ВАСИЛЬЕВ.