25 февраля 2015 г.
Çамрăк ăрăва патриотизмла воспитани парасси – пĕрле тумалли ĕç. Çакна асра тытса «Совет офицерĕсен союзĕ» обществăлла организацин вырăнти уйрăмĕ, пограничниксен районти обществи, Вăрнарти ял хуçалăх техникумĕ пĕрлешсе шкул ачисем хушшинче пăшалтан тĕл перессипе тата Калашников автоматне салатса пуçтарассипе ăмăрту йĕркелерĕç.
Паллах, тупăшура вăйлисем çĕнтереççĕ. Анчах та ун пĕлтерĕшĕ пысăк. Ачасене вăл чăн-чăн хÿтĕлевçĕ, паттăр пек туйма пулăшать.
Çамрăксене техникум директорĕ Владимир Казаков запасри офицер, Мускаври пĕрремĕш кадет корпусĕн инженери службин ертÿçи Эрик Васильев полковник саламларĕç.
Ăмăртăва Николай Васильев запасри офицер çÿллĕ шайра йĕркелерĕ. Пĕрремĕш вырăна Çĕрпелти, иккĕмĕшне – Хапăсри, виççĕмĕшне Вăрнарти 2-мĕш вăтам шкулсем йышăнчĕç. Çак командăсене хатĕрлекен вĕрентекенсене Юрий Горбунова, Дмитрий Герасимова тата Рустам Салахутдинова «Совет офицерĕсен союзĕ» ячĕпе тав сăмахĕ калатăп.
Çакнашкал тупăшу кашни çулах иртет. Малтанхи çулсенче çĕнтерÿçĕсене чыслама «Рабица» тата «Надежный» обществăсем парнесемпе пулăшнăччĕ. Шел те, кăçал спонсорсем тупăнмарĕç, патриотсене хавхалантарас текен пулмарĕ.
Б.ВАСИЛЬЕВ.