25 февраля 2015 г.
Калининăри психикăпа неврологи интернатĕнче сипленекенсен команди – хĕллехи спорт тĕсĕсем енĕпе инвалидсем хушшинче ирттерекен республика фестивалĕн пĕрре мар çĕнтерÿçи. Пĕлтĕрхи ăмăртура çĕнсе илнĕ кубок та калининăсенчех. Çак сăлтавпах интернат кăçалхи фестиваль хăнисене хăйсем патĕнче йышăнма тивĕçнĕ.
Спорт уявĕ чăннипех те савăнăçлă та туслă лару-тăрура иртнĕ. Республикăри интернатсен çичĕ команди килсе çитнĕ кунта тĕрлĕ тупăшусенче вăй виçме. Ăмăртусем пуçланас умĕн спортсменсене Сергей Кузьмин директор саламланă. Пурне те çивĕчлĕхпе хастарлăх кăтартма суннипе пĕрлех вăл спорт сывлăх çăлкуçĕ пулнине палăртнă.
Фестиваль программи виçĕ конкурса пĕрлештернĕ: йĕлтĕрпе чупассипе эстафета, канат туртасси тата дартс вăййи. Ăнăçу вăйлисен енче теççĕ те – калининăсем хальхинче те хăйсене пуринчен маттуртарах кăтартнă. Икĕ тупăшура, йĕлтĕр йĕрĕ çинче тата канат туртса, вĕсене никам та çитекен пулман. Çапла Калининăри психикăпа неврологи интерначĕн команди пĕтĕмĕшле кăтартусемпе те пуринчен нумайрах очко пухнă, çĕнтерÿ кубокне хăйсем патĕнчех хăварма пултарнă.
Уява хаваслă концерт вĕçленĕ: интернат артисчĕсем фестивале хутшăнакансене илемлĕ юрă-ташăпа, сценкăсемпе савăнтарнă.
И.ЯКОВЛЕВА.