25 февраля 2015 г.
Вăрнар поселокĕнчи Ленин урамĕнчи 2-мĕш çурта ăшăпа тивĕçтерес ĕçри пăтăрмахсем пирки. Çурта тĕпрен юсанă хыççăн ăшă счетчикĕ вырнаçтарчĕç. 2012 – 2013 çулсенчи хутса ăшăтмалли тапхăрта вăл юрăхсăра тухнă, ăна юсава янă терĕç.
2013 çулхи мартăн 22-мĕшĕнче район библиотекинче иртнĕ Прокурор кунĕнче пирĕн çурт канашĕн председателĕ ăшă счетчикĕ пирки ыйту çĕкленĕ. Çакăн хыççăн виçĕ кунтанах хайхи счетчика вырнаçтарнă-мĕн. Тепĕр кунне счетчик кăтартнине çырса илме тесе çурт канашĕн председательне Л.Лебеденкăна чĕннĕ. Мĕншĕн-ха ăна счетчика хута янă чухне чĕнмен; Эппин, счетчик юрăхсăра та тухман; «Интех» обществăна, ахăртнех, çынсем счетчик кăтартăвĕ тăрăх тÿлесе тăни тупăшлах мар пулас;
Пĕлтĕрхи мартра ăшă счетчикĕ вуçех ĕçлеме пăрахнă. Паянхи куна та çĕннине вырнаçтарман.
Тата çурт хуçисем ирĕк памасăрах «Интех» общество путвалăн пĕр пайĕпе тÿлевсĕр усă курать. Каçсерен час-часах кунта сварка ĕçĕсем пыраççĕ. Ăшă тапхăрта çурт çумĕнчех машинăсене çăваççĕ. Пурăнмалли çурта тытса тăмалли тарифа вуçех йышăнмаççĕ. Ăшă парса тăракан датчиксене проекта пăсса вырнаçтарнă. Çакнашкал шухăш çуралать: «Интехра» ĕçлекенсем çынсемшĕн мар, хăйсемшĕн кăна тăрăшмаççĕ-ши; Тата халăхпа йĕркеллĕ, этемле калаçма та вĕренмелле тесе шутлатпăр. Эпир мар, вĕсем пире тытса тăраççĕ, тейĕн.
Ленин урамĕнчи 2-мĕш çуртра пурăнакансем – пурĕ 32-ĕн алă пуснă.