18 февраля 2015 г.
Нумай пулмасть йĕркеленнĕ «Зорюшка» («Ирхи шуçăм») ансамбль Пăваялĕнчи культура çуртне Вăрнартан килсе çитрĕ. Ушкăнра 7 çын, пурте Вăрнарти ветерансен хорĕнче ăсталăха туптанăскерсем. Халăха, çамрăксене килĕшекен юрă-ташăпа савăнтарчĕç. Ертÿçи – хамăр ялта ÿссе çитĕннĕ, халĕ Вăрнарта пурăнакан Тамара Курсова. Уйрăмах Зоя Белякова, Роза Тихонова шăрантарнă юрăсем, «Куккук», «Кĕмĕл шыв юххи», ялйыш кăмăлне кайрĕç.
Зоя Белякова 40 çул Вăрнарти хутăш препаратсен заводĕнче вăй хунă. «Мăшăрăм вăхăтсăр çĕре кĕрсен пĕччен тăрса юлтăм, ветерансен хорĕнче çăлăнăç тупрăм, юрăсем чуна пусарчĕç тата тус-юлташсем тупрăм. Репетицисене ĕçе кайнă пек васкатăп», – пĕлтерет Зоя.
Аля Печкина, мăшăрĕнчен 25 çултах пĕччен тăрса юлнă, хĕрне хăех ура çине тăратнă, Вăрнарти аптекăра фармацевтра ĕçлесе тивĕçлĕ канăва тухнă. Ветерансен хорĕ йĕркеленнĕренпех унта çÿрет.
Концерта пăхса савăннă май, çынсем хăйсен çамрăклăхне, ырă пулăмсене аса илчĕç. Çавăн пекех çак кун тивĕçлĕ канăва тухнă Альбина Николаевна Васильева ячĕпе чылай юрă янăрарĕ. Вăл Вăрнарти аш-какай комбиначĕн Кăмашри хушма хуçалăхĕнче сысна комплексĕнче операторта ĕçлет. Концерт хыççăн ансамбль артисчĕсем залри халăха ташлаттарса савăнтарчĕç.
– Сирĕн яла килме кăмăллă, халăхĕ тарават, культура çуртĕнче тирпейлĕ, ăшă та хăтлă. Юрра-ташша юрататăр, – терĕç артистсем.
Малалла та маттур аталантăр ку коллектив. Хăйсен пултарулăхĕпе тĕрлĕ ял халăхне савăнтарччăр, тыткăнлаччăр.
А.ПЕСКОВА.
Пăваяль.