18 февраля 2015 г.
Патшалăхăн пĕрлехи экзаменĕсем вĕрентÿ процесĕн тĕп пайĕ пулса тăчĕç. Çавна май ку ыйту вĕрентекенсемпе вĕренекенсен çеç мар, пуçлăхсен те уйрăм тимлĕхĕнче.
Шкултан тухакансем экзамена хатĕрленсе вăл е ку предмета шĕкĕлчеме тытăннă ĕнтĕ. Пирĕн районта кăçал 11-мĕш класа 161 вĕренекен пĕтерет. Декабрьте çырнă сочинени кăтартăвĕсемпе вĕсем пурте экзамена кĕме тивĕç пулнă. Пĕрлехи экзамен пункчĕ ытти çулхи пекех Вăрнарти 1-мĕш шкул шутланать. Унти аудиторисене видеосăнавсемпе тивĕçтернĕ. Экзамен пунктне кĕрекенсене металлодетекторпа тĕрĕслессине йĕркеленĕ.
Патшалăхăн пĕрлехи экзаменĕсем кăçал тата çирĕпрех йĕркепе иртĕç. Кун çинчен эрнекун Раççей Правительствин председателĕ Дмитрий Медведев ирттернĕ селекторлă канашлура пĕлтернĕ. Унта Чăваш ен Пуçлăхĕ Михаил Игнатьев та хутшăннă.
Патшалăхăн пĕтĕмлетÿллĕ аттестацийĕн тĕп предмечĕсем – яланхиллех вырăс чĕлхипе математика. Çавăн пекех ачасем хăйсен ирĕкĕпе хушма 12 предмета суйласа илме пултараççĕ.
Пĕлтĕртенпе ППЭ ирттернĕ чухнехи йĕркене пăсассине асăрхаттарса экзамен материалĕсене вырăна çитерес схемăна улшăнусем кĕртнĕ. Интернетра ППЭ заданийĕсен банкне уçнă.
Ытти хăш-пĕр регионти пекех кăçалтан Чăваш енре те ППЭ иртекен пунктсенче сотовăй телефонсен çыхăнăвне хуплакан глушительсем вырнаçтарчĕç. Ытти çулхи пекех ППЭ тĕлĕшпе «вĕри лини» тата тематика сайчĕ ĕçлет. Шкул директорĕсемпе экзаменсене хатĕрленсе ирттерес ыйтусемпе семинар-канашлусем пухнă ĕнтĕ.
С.ЧИКМЯКОВА.