14 февраля 2015 г.
Тăван çĕршывăн Аслă вăрçинче çĕнтернĕренпе 70 çул çитнине çÿллĕ шайра паллă тума Раççей Следстви Комитечĕн республикăри следстви управленийĕ те хăйĕн тÿпине хывать. Следовательсем уйрăмах ачасемпе çамрăксене çарпа патриотизм туйăмĕсемпе хавхалантарас тĕллевлĕ, вĕсене аслашшĕсемпе мăн аслашшĕсен, тăванĕсен вăрçăри паттăрлăхне çутатакан документсемпе, çемье архивĕсемпе кăсăкланма хистесшĕн, пултарулăхĕсене аталантарма пулăшасшăн. Çавăнпах Çĕнтерÿ кунĕ умĕн «Следстви органĕсен ветеранĕсен союзĕ» организаципе пĕрле тата «Чувашия» телерадиокомпани пулăшăвĕпе харăсах темиçе конкурс ирттересси пирки пĕлтереççĕ.
Пĕрремĕшĕ – «Эпĕ асра тытатăп. Эпĕ мухтанатăп!» видеороликсен конкурсĕ. Унта шкулсенче вĕренекенсемпе пĕрлех професси вĕрентĕвĕн учрежденийĕсен тата аслă шкулсен студенчĕсем те хăйсене тĕрĕслеме пултараççĕ. Ятĕнченех паллă: конкурса хутшăнакансен видеоматериалсем хатĕрлемелле, вĕсем 3 минутран ытла тăсăлмалла мар. Темисем çакăн пек: тыл ĕçченĕсем, фронтовиксем, çапăçу хирĕнчен янă çырусем, фашист лагерĕсенче ирĕксĕрлĕхре пурăннисем, +ĕнтерÿ символĕсем тата палăкĕсем, эвакуаци госпиталĕсем, шырав отрячĕсен ĕçĕсем, çар мухтавĕн вырăнĕсенчи çулçÿревсем, ăрусен çыхăнăвĕсем çинчен тата вăрçă ветеранĕсемпе вĕсен тăванĕсен аса илĕвĕсем. Видеоĕçсене малтанах www.youtube.com сайтра вырнаçтармалла, çакăн хыççăн авторăн следстви управленийĕн su-chuvashia@yandex.ru электрон почтипе апрелĕн 17-мĕшĕччен заявка ямалла.
Тепĕр конкурсра («Эпир – Çĕнтерÿçĕ-халăх йăхĕ») ачасене литература анинче пултарулăха кăтартма йыхравлаççĕ. Номинацисем иккĕ – проза тата поэзи, сĕнекен темăсем – «Фронтран янă çыру», «Вĕсем Çĕнтерĕве тылра туптанă», «Эпĕ – Çĕнтерÿçĕ-халăх йăхĕ». Пултарулăх ĕçĕсене хальхинче те электронлă мелпе su-chuvashia@yandex.ru электрон почта ещĕкне ямалла. «Чĕре астăвăмĕ» ÿкерчĕксен конкурсне тăратакан ĕçсене вара мартăн 31-мĕшĕччен комиссие (Шупашкар хули, Ленинград урамĕ, 33-мĕш çурт) почтăпа ăсатмалла е вырăна килсе памалла. Ÿкерчĕксем, паллă ĕнтĕ, Тăван çĕршывăн Аслă вăрçин саманчĕсене çутатмалла, Аслă Çĕнтерÿпе çыхăнмалла.
Конкурссем пирки тĕплĕнрех Раççей Следстви комитечĕн следстви управленийĕн сайтĕнче паллашма пултаратăр.
И.ПЕТРОВА.