11 февраля 2015 г.
Чăваш Республикин Пуçлăхĕн Михаил Игнатьевăн Çырăвĕнче палăртнă пек чĕрĕ сĕт пахалăхне тĕрĕслес, хаксене йĕркелес, уйрăм хуçалăх тытакансене тÿлес тытăма туса хурас тĕллевпе районти ветеринари служби халăхран пухакан сĕте «Клевер» приборпа тĕрĕслеме тытăннă.
Хальлĕхе çичĕ ялта 81 проба илнĕ: Çĕрпелте – 11, Чăрăш Ишекре – 20, Ярмушкара – 10, Çĕн Мĕлĕшре – 10, Кăмпалта – 10, Шăхальте – 10, Пăртасра – 10.
69 проба мĕнпур кăтартупа патшалăх стандартне тивĕçтернине, 12-че вара сĕте шыв хушнине палăртнă.
Ку кăтартусене уйрăм хуçалăх тытакансене тата ял поселенийĕсен пуçлăхĕсене пĕлтернĕ. Ырă мар шухăшлисем малашне ветслужбăн уйрăм тимлĕхĕнче пулĕç, вĕсем çинчен сĕт пухакансене те пĕлтернĕ. Çавăн пекех шывпа хутăштарнă сĕт пирки ветеринари докуменчĕсене те памĕç.
Чĕрĕ сĕте туянас тытăм уçă пулмалла – пысăк пахалăхлă продуктшăн сĕте параканăн лайăх укçа илмелле. Çынсене сĕтшĕн тÿлессине йĕркелесси – пĕрлехи задача, анчах ĕне тытаканăн хăйĕн те паха сĕтшĕн тивĕçлĕ тÿлев ыйтмалла.
Г.ЯКОВЛЕВ,
выльăх-чĕрлĕх чирĕсемпе кĕрешекен
районти станци пуçлăхĕ.