11 февраля 2015 г.
«Раççей йĕлтĕр йĕрĕн» Вăрнарта иртнĕ тĕп стартне кăна 1200 ытла йĕлтĕр тусĕ тухрĕ. Маларах, эрнекун, акци йĕркипе кĕçĕн классем хушшинче иртнĕ чупăва 180-ăн хутшăннă. Çĕрпелсем, хурăнсур-çармăссем вырăнта стартсем йĕркеленĕ.
– Вăрнарсем спорт районĕ пулнипе тивĕçлипе мухтанма пултараççĕ. Ку тăрăхран паллă спортсменсем чылай тухнă. Çамрăксем республика, Раççей пьедесталĕсене çĕнеççĕ, – терĕ Чăваш ен Юстици министрĕн заместителĕ Алексей Вязов.
Район администрацийĕн пуçлăхĕ Леонид Николаев кашниех спорт мастерĕ пулаймасть пулин те ку тĕспе мĕнпур çын туслашма пултарнине палăртрĕ.
«Раççей йĕлтĕр йĕрне» хутшăнакансем вара ку енĕпе – чăннипех те паха тĕслĕх. Чупуран аслă çулхисем юлманни уйрăмах савăнтарать – çамрăксен мĕншĕн вĕсенчен кая юлмалла;
Вăрнарта пурăнакан Галина Степанова, ав, 75-ре. Пĕр километра вăл ним мар çĕнчĕ, çĕнтерÿçĕ Кубокне тивĕçрĕ. Йĕлтĕр спортĕнче вăл чăннипе те ас. Медальсемпе грамотăсем туллиех унăн. Хăй вăхăтĕнче конькипе те вĕçсе кăна ярăннă. Массăллă чупура ун мăнукĕсем те кăтартуллă чупрĕç. Катя Герасимова та (вулакансем ăна Логачева хушаматпа аван пĕлеççĕ) – республикăн пĕрре мар çĕнтерÿçи – япăх мар ăмăртрĕ, вăхăт кăтартăвĕпе – иккĕмĕш.
Нина Кондратьева, Ярмушка шкулĕнче кĕçĕн классене вĕрентекенскер, йĕлтĕр йĕрĕ çине тухмасăр пĕр кун та ирттермест. Тепĕр чухне кунне виçшер хут та ярăнатăп, тет вăл. Палăртма кăмăллă – «Раççей йĕлтĕр йĕрне» районта ирттерме тытăннăранпа хăйĕн ÿсĕмĕнче хĕрарăмсенчен унран хальлĕхе никам та иртмен-ха.
Хĕллехи спорт тĕсĕсен Пĕтĕм Раççейри кунĕн йĕркипе иртнĕ чупун кашни старчĕ йышлă пулчĕ. VIP-чупăмра район администрацийĕн пуçлăхĕ Леонид Николаев, унăн заместителĕсем Вячеслав Горбуновпа Николай Петров, пай пуçлăхĕсем, предприяти-организаци ертÿçисем, ял тăрăхĕсен пуçлăхĕсем тĕслĕх кăтартрĕç. Дистанцие çиçĕмле вĕçлекенни кăçал та «Звездопад» филиалĕн директорĕ Владимир Яковлев пулчĕ.
«Раççей йĕлтĕр йĕрĕн» символла Кубокĕсене çавăн пекех Юрий Петров (Чăрăшкас Хирлеп), Валентинăпа Галина Тикиневасем (1-мĕш шкул), Максим Коршунов (Çĕрпел), Даниил Сергеев (2-мĕш шкул), Катя Лукина (1-мĕш шкул), Василий Иванов тата Валентин Иванов (Ярмушка), Настя Петрова (Шăхаль), Дима Герасимов (Вăрнар), Эльвира Чугунова (Вăрманкас) тата Владимир Тикинев (Мăньял Хапăс), Галина Павлова тата Людмила Васильева (ял хуçалăх техникумĕ), Евгений Алексеев (Упнер), Георгий Никишов (Вăрнар) тивĕçрĕç.
Кĕçĕн классем хушшинче иртнĕ чупура пĕрремĕш вырăна Туçи Çармăсри Лариса Курбатова тата Хапăсри Михаил Федотов тухнă.
Çакна та каламалла, ку ăмăртура Хапăсри вăтам шкулти Михаил Павловăн вĕренекенĕсем виççĕн тан çĕнтерÿ пьедесталĕ çине тăма тивĕçнĕ, ылтăн призерсăр пуçне Юлия Шляпкина тата Владимир Шашкин. Вырсарникунхи стартра Михаил Павлович хăй те сатур пулчĕ – хăй ÿсĕмĕнче дистанцие иккĕмĕш вĕçлерĕ.
– Ку ăмăртупа кăна ан çырлахăр. Вăхăт тупса йĕлтĕр йĕрĕ çине тăтăшрах тăма тăрăшăр. Сире йĕлтĕр базинче те – «Химик» стадионта та хапăлласа кĕтеççĕ, – тепĕр чупуччен сывпуллашса йыхравларĕ районăн тĕп физкультурникĕ Сергей Политов.
С.ЧИКМЯКОВА.