11 февраля 2015 г.
Вырсарникун кăнтăрла Калинино – Шăхасан автоçул çинче хăйне евĕрлĕ инкек çырăннă: лаша кÿлнĕ çуна «аварие» лекнĕ. Çак пăтăрмахлă ĕç Чалăм Кăкшăм ялĕ çывăхнелле пулса иртнĕ. Çул-йĕр правилисене пăсаканĕ Çĕмĕрлере пурăнакан 45-ри хĕрарăм. Вăл, Лада-111930 автомобильпе пынăскер, тăрук çуна çине кĕрсе кайнă. Лаши хăранипе кăна хăтăлса юлнă-ха, анчах ăна тытса пынă арçынна ун пек ăнăçман. Тĕрлĕ сурансемпе 56-ри Л.-на больницăна леçнĕ.
Иртнĕ ытларикун Вăрнарта пĕр уйрăм çуртра кил тĕрĕшри япаласене вăрласа тухнă тĕслĕх пулнă. Полици сотрудникĕсем киревсĕр ĕçе тăвакана палăртнă ĕнтĕ – вăл темиçе хут та судпа айăпланнă 44-ри Ф. тесе шутлаççĕ.
Арçын Ленин урамĕнчи çурта чÿрече рами çинчи фанерăна тăпăлтарса кĕнĕ, кашăк-вилка пуххисене, алшăлли, сехет, чÿрече каррисене тата ытти вак-тĕвеке йăкăртнă. Вăрă преступление тунă чух ытлашшиех «асăрханман» курăнать – хăварнă «йĕрсем» тăрăх йĕрке хуралçисене ăна шыраса тупма кăткăсах пулман.
Юнкун районти полици пайне 18-ти С. пулăшу ыйтса килнĕ. Заявленинче кăтартнă тăрăх, унăн банк карттинчен такам 6400 тенкĕ вăрланă иккен. Карттăна абонент номерĕпе «мобильлĕ банк» тивĕçтерÿпе çыхăнтарнă пулнă. Ют укçапа саккунсăр усă курнă çынна палăртассипе шырав ĕçĕсем пыраççĕ.
И.ЯКОВЛЕВА