31 января 2015 г.
Вăрнарти 2-мĕш вăтам шкулта Тăван ҫĕршывăн Аслă вăрҫи ҫинчен калакан курав вырăн тупнă
Картина галерейине асăннă вĕренў учрежденийĕ (районта пĕртен-пĕр) «Радуга» культурăпа курав центрĕн «Ачасене – Аслă Ҫĕнтерў ҫинчен» проектпа тивĕҫнĕ. Пуҫаруҫă шкулсене те хăй суйласа илнĕ. «Радуга» специалисчĕсем мĕнпур район шкулĕсен сайчĕсене тĕпченĕ, чи хастаррисене палăртнă.
Кашни районтах Ҫĕнтерў ҫинчен калакан ўкерчĕксен куравне йĕркелес ĕҫе ачасене: ашшĕ-амăшне, педагогсене, ветерансене пĕрлештерес шухăш хывăннă. Вăл истори учебникĕсем ҫумне хушма кăтартуллă материал та пулса тăрĕ.
Ку – пĕр кунлăх проект мар. Курава шкулсене яланлăх панă. Репродукцисемпе ытти вĕренў учрежденийĕсене те паллаштарас тĕллевпе проекта ачасем хăйсем экскурси ирттерме пултарассине те кĕртнĕ.
Ҫар галерейи шкулăн 2-мĕш хутри фойинче вырнаҫнă. Ўкерчĕксем Тăван ҫĕршывăн Аслă вăрҫин паллă ҫапăҫăвĕсене тата тĕп пулăмĕсене палăртаҫҫĕ. Унта фронтри ҫеҫ мар, тылри пурнăҫ та, партизансен юхăмĕ те тарăннăн ҫуталнă. Кашни репродукци айĕнче – ăнлантару тексчĕсем.
– Ҫак курава районти шкулсене пани пĕлтерĕшлĕ. Паянхи пурнăҫра, историе ҫавăрттарса ҫырас текенсем тупăннă вăхăтра, пушшех те. Ҫитĕнекен ăрăвăн Тăван ҫĕршывăн Аслă вăрҫин тĕп саманчĕсене: паттăрĕсене, Ҫĕнтерў мĕнле йывăрлăхпа туптаннине пĕлмеллех: – терĕ район администрацийĕн вĕрентўпе ҫамрăксен политикин пайĕн пуҫлăхĕн тивĕҫĕсене пурнăҫлакан Маргарита Тихонова.
Асăннă курава официаллă майпа уҫман-ха, анчах та истори учителĕн Тамара Александровна Алексееван вĕренекенсене ăнлантармалли пур. Истори урокĕсем ўкерчĕксем умĕнче иртеҫҫĕ те ĕнтĕ.
С.ЧИКМЯКОВА.