25 февраля 2014 г.
Çĕр-шыв хÿтĕлевçисен кунĕ умĕн Калининăри 7-мĕш кадет класĕнче хăнара Чăваш енри кадет юхăмĕн пуçаруçисенчен пĕри, Чăваш Республикин РФ Президенчĕ çумĕнчи полномочиллĕ представителĕнче ĕçленĕ Анатолий Иванович Григорьев пулнă. Тĕлпулу ăшă лару-тăрура иртнĕ: Анатолий Иванович хăйĕн професси çул-йĕрĕпе паллаштарнă, çавăн пекех ачасем пултарулăхри тата спортри çитĕнÿсене пĕтĕмлетнĕ. Анатолий Иванович кадетсене Раççей тĕп хулине экскурсие чĕннĕ.
Иртнĕ шăмат кун та Калининăри шкулта хаклă хăнасем пулнă, вĕсем – кунтан вĕренсе тухнă Валерий Андреевич Федоров контр-адмирал тата Михаил Петрович Григорьев генерал-майор. Çĕр-шыв хÿтĕлевçисен кунне халалланă уявра вĕсем хăйсен пурнăçĕпе ĕçĕ-хĕлĕ, çар служби çинчен каласа кăтартнă, вĕренекенсене ăнăçу тата хастарлăх суннă. Çамрăк армеецсен отрячĕсем тата кадет класĕ хăнасем умне плац-концертпа, юрă-ташăпа тухнă.
Çак тĕлĕнмелле тĕл пулусем ачасен асĕнче нумайлăха юлĕç.
И.СЕРГЕЕВА