20 января 2014 г.
Район спортсменĕсем иртнĕ çула ăнăçлă вĕçлерĕç. «Халĕ мартри турнира хатĕрленетĕп», – терĕ Вăрнар каччи Алексей Кириллов штангист. Çĕнĕ çул умĕн вăл Çĕнĕ Шупашкарта йывăр атлетика енĕпе иртнĕ республика чемпионачĕн çĕнтерÿçи пулса тăнă. 94 килограмлă виçе категорийĕнче вăй виçнĕ. Чемпион – Юрий Павлович Агиловăн вĕренекенĕ.
Футболистсен те канма вăхăт çук. «Химик-Августăн» 1998 çулта çуралнă каччăсен команди Хусан хулин Хĕллехи уçă первенствинче тупăшать. Хăйĕн ушкăнĕнче Александр Строганов тренерăн вĕренекенĕсем пĕрремĕш вырăна тухнă.
Ыран, январĕн 19-мĕшĕнче, финалăн пĕрре-тăваттăмĕш пайĕнче «Химик-Август» Хусанти «Мирас» командăпа тĕл пулĕ. Татса паракан вăйă çамрăксене виççĕмĕш вырăншăн е финала тухма шанăç парать.
Уçă первенствăра пĕтĕмпе вунпĕр команда вылять. «Химик-Августсăр» пуçне ыттисем пурте – Хусан хулин командисем.
Футбол тусĕсене Вăрнарти «Химик» стадион та йыхравлать. Кунта паянтан пуçласа февралĕн 22-мĕшĕччен хутăш препаратсен завочĕн тата «Август» Фирмăн хушма компанийĕсен ĕçченĕсен пĕрлештернĕ командисем тупăшĕç. Вăйăсем шăмат кунсерен иртеççĕ. Турнира «Химик» спорт клубĕ 10 çул çитнине халалланă.
С.ЧИКМЯКОВА.