13 января 2014 г.
Çĕнĕ çул каникулĕнче район спортсменĕсем тĕрлĕ тĕсре вăй виçрĕç.
Йĕлтĕрçĕсем республикăри ăмăртусен старчĕсене хутшăннă. Лапсарта иртнĕ Çĕнĕ çулхи чупура Туçи Çармăс ачисем Дима Павлов тата Павел Волков лайăх кăтартусемпе палăрнă.
Ленăпа Зоя Зайцевасем Хусан хулинче виççĕмĕшпе тăваттăмĕш вырăнсене йышăннă, Канаш хулинче иртнĕ йĕлтĕр чупăвĕнче кĕмĕл тата бронза призерсем пулса тăнă.
«Чĕнÿ Кубокĕ» ятпа иртнĕ йăлана кĕнĕ Раштав турнирĕнче ял тата поселок çамрăкĕсен вунă команди тупăшнă. Шкул ачисем хушшинче çĕнтерĕве хĕрачасенчен çĕрпелсемпе кÿстÿмĕрсен пĕрлештернĕ команди çĕнсе илнĕ, арçын ачасенчен – Вăрнарти шкулсенче вĕренекенсем.
Çамрăксен ушкăнĕнче поселок хĕрĕсем вăйлăрах пулнă, каччăсем ял командине выляса янă. Ветерансем хушшинче те çĕнтерÿ Кубокĕ Вăрнара юлнă. Ку ушкăнра район администрацийĕн пуçлăхĕ Леонид Николаев, унăн заместителĕ Вячеслав Горбунов та вылянă.
Волейбол турнирĕсем çавăн пекех Ершепуç тата Малти Ишек ял поселенийĕсенче хĕрÿ иртнĕ.
Федор Гурьевич Соколова асăнса ирттерекен сĕтел çи теннис турнирĕ кăçал та çамрăксене чылай пуçтарнă. Кăçалхи çĕнтерÿçĕсем çаксем: Юрий Антонов тата Дарья Феофанова (Шупашкар). Кĕмĕл призерсем – Александр Фролов (Çĕмĕрле) тата Настя Канькина (Хапăс). Вăрнарти Василий Кокин тата Хапăсри Валентина Иванова бронза медальсене тивĕçнĕ.
Андрей Романова асăнса ирттернĕ футзал турнирĕ вунпĕр команда пуçтарнă. Унта Шупашкар, Çĕмĕрле хулисенчен, Çĕмĕрле тата Канаш районĕсенчен килнĕ футболистсем те хутшăннă. Пĕрремĕшпе иккĕмĕш вырăнсене хăнасем йышăннă. «Янгорчино» ял хуçалăх кооперативĕн команди – виççĕмĕш вырăнта.
Ачасемпе çамрăксен спорт шкулĕн парнисемшĕн иртнĕ уçă турнирта кавир çине 100 ытла кĕрешÿçĕ тухнă. Вĕсем – Кĕçĕн Кипекри, Мăн Явăшри, Вăрнарти 1-мĕшпе 2-мĕш шкулсенче, ял хуçалăх техникумĕнче тата 29-мĕш професси училищинче вĕренекенсем. Çĕнтерÿçĕсене 25 виçе категорийĕнче палăртнă.
С.ЧИКМЯКОВА.