13 января 2014 г.
Январĕн 6-мĕшĕнче, Раштав умĕн, Калинино салинчи клуба ачасемпе ашшĕ-амăшĕсем нумаййăн пухăнчĕç. Вĕсене Чăвашпотребсоюзăн профсоюз канашĕн председателĕ Надежда Гомоля, Калинино райпо канашĕн председателĕ Венера Николаева Çĕнĕ çулпа тата Раштав уявĕпе пĕтĕм кăмăлтан саламларĕç. Ачасене Шупашкарти çамрăксен театрĕн артисчĕсем «Чăпар чăх» («Курочка ряба») юмахпа савăнтарчĕç. Пĕчĕк шăпăрлансемпе шкул ачисем елка тавра сăвă каласа, юрласа-ташласа çаврăнчĕç. Театр артисчĕсем Хĕл мучи, Юр пике, вупăр, Çĕнĕ çул лашин тата ытти сăнарсене вылярĕç. Эх, мĕн чухлĕ савăнăç, çĕнĕлĕх пулчĕ ачасемшĕн! Шутланă ĕмĕчĕсем пурнăçланччăр тесе, Лаша ачасене те, аслисене те хăйĕн асамлă пĕкки витĕр кăларчĕ.
Хĕл Мучи кучченеçĕсемшĕн мĕнле хĕпĕртерĕç тата ачасем. Уява ирттерме Чăвашпотребсоюзăн профсоюз канашĕ пулăшрĕ.
М.СЕРГЕЕВА, райпо канашĕн членĕ.