13 января 2014 г.
Çулталăк вĕçĕнче РФ Пенси фончĕн республикăри уйрăмĕ сотрудниксем хушшинче сăн ÿкерчĕксен конкурсне ирттернĕ. Унта тĕрлĕ районтан, хуларан 120 сăн ÿкерчĕк тăратнă, 12 авторăн ĕçĕсене жюри чи лайăххисем тесе палăртнă. Çак йышра пирĕн ентеш те пур. «Активное долголетие» темăна çутатнă пултарулăх ăмăртăвĕнче Вăрнарти управлени специалисчĕ Ирина Егорова çĕнтерÿçĕ пулса тăнă.
Чи лайăх сăн ÿкерчĕксенчен илемлĕ альбом-календарь пухнă. Вĕсенче, тĕпрен илсен, пенсире те тунсăхлама вăхăт çуккине кăтартнă. Сăн ÿкерчĕксенче – пенсионерсем компьютерпа ĕçлеме вĕренни, спортпа туслă пулни, пушă вăхăта мăнуксемпе усăллă ирттерни, пултарулăх ушкăнĕсене хастар хутшăнни, хÿхĕм чечексем ÿстерни е кăмпана çÿреме юратни тата ытти те.
Çĕнтерÿçĕсене Раççей Пенси фончĕ йĕркеленнĕренпе 23 çул çитнине халалланă уявра дипломпа чыслаççĕ.
И.ЯКОВЛЕВА.