13 января 2014 г.
Раштав уйăхĕнче Смоленск хулинче аслă ăрурисем хушшинче пултарулăх ушкăнĕсен «Чунпа яланах çамрăк» Пĕтĕм Раççейри форумĕ пулса иртрĕ.
Çак уява эпир те – районти ветерансен халăх хорĕ – хутшăнма тивĕçрĕмĕр. Чăваш Республикинчен пĕр ушкăн çеç пулчĕ. Пирĕнсĕр пуçне унта Дагестан республикин, Брянск, Владимир, Калуга, Курск, Псков, Рязань, Смоленск облаçĕсен коллективĕсем хăйсен пултарулăхне кăтартрĕç.
Смоленскра пире лайăх кĕтсе илчĕç. «Красный бор» санаторие вырнаçтарчĕç. Пурăнма, апатланма тăкаксене Раççей Федерацийĕн Культура министерстви саплаштарчĕ.
Тăватă куна пынă ятарлă программăпа тĕрлĕ культура мероприятийĕсем иртрĕç: чи малтанах ытти пултарулăх ушкăнĕсемпе туслашрăмăр. Бедрос Киркоровпа паллашни, асăнмалăх сăн ÿкерĕнни уйрăмах асра юлчĕ.
Форума Смоленск хулинчи А.С.Грибоедов ячĕллĕ драма театрĕнче уçрĕç. Алă ăстисен куравне хутшăнтăмăр. Хамăр чăваш тĕррисемпе, туй хатĕрĕсемпе паллаштартăмăр. Иккĕмĕш кунне Починок район центрĕнче Рязаньтен килнĕ ветерансен хорĕпе пĕрле пысăк концерт кăтартрăмăр. Каялла çула тухас умĕн пире Смоленск хулине экскурсие илсе кайрĕç. Вăрçă вăхăтĕнчи çапăçусем пулнă вырăнсене кăтартрĕç. Кану каçĕсем, çавра сĕтел, мастер-класс ирттерчĕç. Юлашкинчен «Красный бор» культура çуртĕнче гала-концерт иртрĕ. Пирĕн коллектив чăвашсен икĕ юррине шăрантарчĕ. Куракансем пире ăшшăн кĕтсе илчĕç. Çак уявран эпир Пĕтĕм Раççейри форум лауреачĕн дипломне, хаклă парнесем илсе килтĕмĕр.
Раççей форумне кайма пире транспортпа, бензинпа пулăшнăшăн «Август» фирмăн «Вăрнарти хутăш препаратсен завочĕ» филиалĕн директорне, Чăваш Республикин Патшалăх Канашĕн депутатне В.В.Свешникова тав сăмахĕ калатпăр. Вăл пире унччен те костюмсем çĕлеттерме 60 пин тенкĕ парса пулăшнăччĕ. Çĕнĕ çулта пысăк çитĕнÿсем тума ăна ырлăх-сывлăх сунатпăр. Ветерансен хорне пулăшнăшăн Смоленск облаçĕн губернаторĕн заместителĕ М.Н.Кузнецов В.В.Свешникова ятарлă Тав çырăвĕ парса ячĕ.
Автобус водителĕсене И.Маслячкинпа В.Сидорова та тав сăмахĕсем калатпăр.
Е.МАТВЕЕВА, Р.СОРОКИНА.