13 января 2014 г.
«Çĕнтерÿ çулĕ» хаçат ирттернĕ вылявра пысăк парне тухнă телейлĕ çынсенчен пĕри – Упнерте пурăнакан Нина Афанасьевна Васильева. Вăл Шупашкар хулинчи Калинин районĕнчи ДОСААФ организацийĕ вылява тăратнă микроволновкăна тивĕçрĕ.
78-ти Нина Афанасьевна чылай çул «Сельхозтехника» уйрăмĕнче бухгалтерта ĕçленĕ, «Вурнарыдорстрой» обществăра склад заведующийĕнче тимлесе тивĕçлĕ канăва тухнă. Пушă вăхăтра халĕ кил-хуçалăхри ĕçсемпе аппаланнипе пĕрлех хаçат-журнал вулама юратать.
«Çĕнĕ çул умĕн кĕтмен парне тухрĕ, çакăншăн питĕ савăнтăм. ДОСААФ организацийĕн председателĕ Анатолий Валерианович Ванин вара ĕмĕтсене пурнăçлакан чăн Хĕл Мучи пулса тăчĕ. Вăл ертсе пыракан организаци малашне те ăнăçлă аталанса пытăр, лайăх пĕлÿллĕ те ăста водительсене вĕрентсе кăларччăр. Вăрнарти филиал та аван ĕçленине илтнĕ, палланă-пĕлнĕ çынсем нумаййăн кунта вĕренсе водитель удостоверенийĕсене илчĕç. Шанчăклă организаци, коллективра – вĕренекенсене çул çинче тĕрĕс çÿреме хăнăхтаракан, пысăк опытлă инструктор-мастерсем. Вĕсене Çĕнĕ çулта ăнăçу сунатăп», – терĕ Нина Афанасьевна пурне те тав туса.
Парнепе Нина Афанасьевнăна Шупашкар хулинчи Калинин районĕнчи ДОСААФ организацийĕн Вăрнарти филиалĕн ертÿçи Геннадий Николаев чысларĕ.
И.ЯКОВЛЕВА.