30 декабря 2013 г.
Республикăри асăннă спорт пĕрлешĕвĕ ирттерекен ăмăртусен çулталăкри пĕтĕмлетÿллĕ таблицинче Вăрнар районĕ унччен те чи çÿлти йĕркене пĕрре мар йышăнма е призерсен йышне кĕме пултарнă. Кăçал вара пуçласа çирĕплетнĕ Кубока тата 25 пин тенкĕлĕх сертификата та Вăрнар районĕ çĕнсе илнĕ.
«Урожай» енĕпе йĕркеленĕ ăмăртусем кăçал та тухăçлă иртрĕç, çĕнтерÿçĕсене вара вунпĕр тĕсре хакланă. Район спортсменĕсем унта хĕллехи ял спорт вăййисенче пĕрремĕш, арçынсен волейбол команди пĕрремĕш, хĕрарăмсен – иккĕмĕш, футболта «Химик-Августăн» аслă ачасем тата кĕçĕннисем чемпионсем пулса тăчĕç. Боксра – пиллĕкмĕш, кире пуканĕ йăтассипе – çиччĕмĕш. Çавăн пекех ял хуçалăх предприятийĕсен пуçлăхĕсен пĕрлештернĕ команди волейболла, мини-футболла япăх мар ăмăртнă.
Района тивĕçнĕ Кубока район администрацийĕн социаллă аталану пайĕн пуçлăхĕн заместительне Сергей Политова «Урожай» ЧРФСО-н ларăвĕнчи чыславра панă. Ăста волейболистсем хатĕрлекен Владимир Иванов «Урожайăн» Тав çырăвне тивĕçнĕ.
Çакна та каламалла, ку Кубок куçса çÿрекенни мар, вăл яланлăхах вăрнарсен çитĕнÿсен çÿлĕкĕ çине вырнаçĕ.
– Ку çĕнтерÿшĕн, паллах, спортсменсем сахал мар вăй хучĕç. Вĕсене пурне те районти спорт аталанăвне пысăк тÿпе хывнăшăн чĕререн тав тăватăп. Çĕнĕ çулта тата хастартарах пуласчĕ, – терĕ савăнăçлăн Сергей Иванович Политов пурне те Çĕнĕ çулпа саламласа.
С.ЧИКМЯКОВА