30 декабря 2013 г.
Уравăш шкулĕн спорт залĕнче «Курск» шыв ай атом крейсер çинче çар тивĕçĕсене пурнăçланă чухне паттăррăн пуç хунă ентеше Виктор Юрьевич Сидюхин матроса чысласа волейбол турнирĕ иртрĕ. Ăна Хирпуç ял тăрăхĕн депутачĕ Александр Иванович Авакумов тăрăшнипе йĕркеленĕ.
Малтанах район администрацийĕн пуçлăхĕн пĕрремĕш çумĕ Вячеслав Анатольевич Горбунов матросăн тăванĕсем умĕнче пуç тайса ăшă сăмахсем каларĕ. Йĕпреç тата Вăрнар районĕсенчи пĕрлешÿллĕ çар комиссариачĕн Хирпуç ял тăрăхĕпе ĕçлекен инспекторĕ – Виктор Сидюхинăн иккĕмĕш сыпăкри аккăшĕ – Елена Петровна Голубцова (Сидюхина) «Курск» крейсер историйĕпе паллаштарчĕ, Виктор кун-çулĕ пирки каларĕ.
Виктор Юрьевичăн ашшĕпе амăшĕ чирленĕ пирки яла килеймерĕç. Елена Петровна çак мероприятие ирттерме пулăшнă спонсорсене Александр Иванович Авакумова, Александр Тимофеевич Федотова, Евгений Алексеевич Архипова тата Хирпуç ял тăрăхĕн администраци коллективне вĕсен ятĕнчен тав сăмахĕ каларĕ.
Турнира тăватă команда килнĕ. 1-мĕш вырăна «Янгорчино», 2-мĕшне «Уравăш», 3-мĕшне «Гвардеец» йышăнчĕç. Хирпуç ял тăрăхĕн пуçлăхĕ Валерий Николаевич Терентьев пурне те Хисеп грамотисемпе тата медальсемпе чысларĕ. 4-мĕш вырăнти «Кĕçĕн Кипек» командăна та медальсемсĕр хăвармарĕç. Çĕрпелсем Виктор Сидюхин матрос ячĕллĕ куçса çÿрекен Кубока тивĕçрĕç.
Паттăр матрос мучăшĕ Николай Михайлович Сидюхин командăсене тата спонсорсене тăвансен ятĕнчен тав турĕ. Михаил Георгиевич Горбунов, «Янгорчино» команда капитанĕ, «Курск» крейсер чи лайăххисен шутĕнче пулнине, унта чи маттуррисене çеç илнине тата Виктора юлашки çула ăсатма килсе кайни çинчен хурланса каласа пачĕ.
Уравăш шкулĕн директорĕ Юрий Владимирович Прокопьев килнисене техĕмлĕ апат-çимĕçпе хăналарĕ, ырă сунчĕ.
А.Авакумов çак турнира кашни çулах ирттерме шантарчĕ.
Г.ПЕТРОВА.