30 декабря 2013 г.
Праски Витти – Вăрнар районĕн хисеплĕ гражданинĕ. Лара-тăра пĕлми ĕçчен. Çуллен тĕрлĕ хуласенче пулма ĕлкĕрет, ют çĕршывсене тухса çаврăнать. Пултарулăхĕпе, çулĕ-йĕрĕпе, тĕл пулусемпе ку çулталăк та тухăçлă пулчĕ. Çуралнă кунĕнче – авăн уйăхĕн 17-мĕшĕнче – Санкт-Петербургри ÿнер-промышленноç академийĕн музейĕнче Виталий Петровичăн ятарлă куравĕ уçăлнă. Унта Чăваш халăх художникĕн, Раççей Федерацийĕн тава тивĕçлĕ художникĕн 79 ĕçне кăтартнă. Çав картинăсене Питĕре çитерме ЧР Патшалăх Канашĕн депутачĕ, Вăрнарти хутăш препаратсен завочĕн директорĕ Владимир Васильевич Свешников пулăшнă. Куракансем, академи профессорĕсем çĕршывĕпех лайăх пĕлекен художникăн хăйне евĕрлĕ пултарулăхне пысăка хурса хакланă. Мероприяти ăнăçнăшăн В.Петров хăй те тулли кăмăллă.
Çу варринче вăл Киевра пулнă, Пĕтĕм тĕнчери эмаль искусствин фестивальне хутшăннă. Фестивале Праски Виттин çывăх тусĕсем – Тамарăпа Александр Бородайсем йĕркеленĕ. Художник унта «Нарспи» темине аталантарнă çĕнĕ ÿкерчĕксене кăтартнă. Киев хыççăнхи Хусанти куравра художник живопись ĕçĕсемпе паллаштарнă, Раççей ÿнер академийĕн Тав çырăвне тивĕçнĕ. Ăна, çавăн пекех, РФ Федераци Канашĕ тав тунă. Юпа уйăхĕнче унта Чăваш енĕн кунĕсене ирттернĕ, çавна май Праски Виттин эмаль ĕçĕсене кăтартнă.
В.МИХАЙЛОВ.