25 декабря 2013 г.
Çĕнĕ çул уявне илемлетме усă куракан пиротехника изделийĕсем савăнăç кÿнипе пĕрлех пысăк хăрушлăх та кăларма пултараççĕ. Çавăнпа та пахалăхсăр, ăçта туса кăларни паллă мар продукцие туянассинчен асăрханăр.
Пиротехника изделийĕсен сертификат, вĕсемпе усă курмалли инструкци, предприяти адресĕ е телефонĕ пулмалла. Фейерверксене официаллă суту-илÿ вырăнĕсенче кăна туянăр, тĕркем е курупка çинче нÿрĕ е чĕрĕлнĕ вырăнсем пулмалла мар.
Фейерверксене йĕпе е ытлашши типĕ пÿлĕмре, хăвăрт хыпса илекен япаласем, ăшă приборĕсем çывăхĕнче упрама юрамасть. Пиротехника изделийĕсене кĕсьере, автомашинăра илсе ан çÿрĕр, ачасем çитеймен çĕре хурăр. Сивĕ чух фейерверксене, нÿрелесрен асăрханса, ăшă пÿлĕмре тытăр. Енчен те вĕсем йĕпеннĕ-тĕк, ăшă приборĕсем çинче е фенпа вĕртерсе типĕтни питĕ хăрушă.
Уявра фейерверк ярас умĕн ăна ăçта вырнаçтармаллине палăртса хурăр. Ку вырăн лаптăкĕ пиротехника изделийĕ çинче кăтартнă хăрушсăрлăх зонипе пĕр килмелле. Çÿлте йывăçсем, электричество пралукĕсем пулмалла мар. Тепĕр чару – вăйлă çил вĕрнĕ вăхăтра пиротехника изделийĕсемпе усă курма юрамасть. Япăх çанталăкра фейерверк яни инкекпе вĕçленме пултарать. Кунсăр пуçне пиротехникăн хăш-пĕр тĕсĕсем йĕпенсен куракансемшĕн хăрушă пулса тăраççĕ. Тĕслĕхрен, йĕпеннĕ ракетăсем çÿлелле вĕçмеççĕ, куракансем çывăхĕнче сирпĕнеççĕ.
Фейерверк ярассишĕн пĕр çын яваплă пулмалла, ÿсĕрле пиротехника çывăхне ан пырăр. Пиротехника изделийĕсене чĕртнĕ чух алăра тытма, ун патне пĕшкĕнме, сÿннĕ хыççăн 10 минут иртмесĕр çывăха пыма юрамасть.
Ракетăсене тата вĕçекен фейерверк изделийĕсене çурт-йĕртен, хуралтăсенчен, уçă чартаклă çуртсенчен аякра ямалла. Çĕр çинчи фейерверксене тÿрĕ вырăна хумалла, вĕсем унталла-кунталла ан куçчăр. Фейерверка чĕртсе яракан çыннăн хăрушă вырăнтан тÿрех пăрăнмалла, çурăмпа çаврăнса тăмалла.
Тĕп правило – фейерверк изделийĕсене усă куриччен те, кайран та салатса пăхма, унăн конструкцине пăсма юрамасть. Çавăн пекех çакнашкал чарусем пур: пиротехника изделийĕсемпе 18 çула çитмен çамрăксен усă курма, вĕсем çывăхĕнче чĕлĕм туртма, изделисене çĕре ÿкерме е çулăма пăрахма; çулăм хăйăвĕ сÿнсен тепĕр хут чĕртме, фейерверка пÿлĕмре яма юрамасть.
Енчен те пиротехника изделийĕн çулăм хăйăвĕ сÿнсе ларчĕ пулсан, ун патне пыриччен 10 минут енне тăхтăр, тĕлкĕшсе тăракан пайсем пурри-çуккине сăнăр. Çунакан пайсем çук-тăк, фейерверка пухса тĕп тумалла – 24 сехетрен кая мар шывра тытмалла. Çакăн хыççăн кăна ăна çÿп-çаппа пĕрле пăрахма юрать.
В.АФИНОГЕНТОВ,
Вăрнарти 27-мĕш пушар чаçĕн пуçлăхĕ.