18 декабря 2013 г.
Спортсменсем хăйсен ÿсĕмĕсемпе савăнтарсах тăраççĕ. Кĕçнерни кун çамрăк кĕрешÿçĕсем район чысне «Чемпион» республика турнирĕнче хÿтĕлесе сумлă кăтартусемпе таврăннă. Ăмăрту Чăваш Республикин пĕрремĕш чемпионне А. Ронине асăнса иртнĕ, чи лайăх 8 кĕрешÿçĕн кăтартăвĕсем республикăри вĕренекенсен 16-мĕш спартакиадин команда зачетне кĕнĕ. 13 район-хуларан килнĕ 150 шкул ачи (1996 çулхисем тата çамрăкраххисем) Çĕрпÿри «Асамат» спорт шкулĕнче вăй виçнĕ.
Никама та çăмăл килмен, çавăнпа та çивĕч тупăшура çĕнсе илнĕ медальсем спортсменсемшĕн пушшех хаклă. Вăрнарсенчен чи лайăх кăтарту поселокри 1-мĕш шкулта вĕренекен Никита Львовăн, арçын ача хăйĕнпе кĕрешекенсене пурне те çĕнтерме пултарнă. Ăмăртăва иккĕмĕш вырăнпа вĕçленисем – Алексей Краснов, Никита Сорокин (2-мĕш шкул), Антон Павлов, Кирилл Лукин (1-мĕш шкул), Ильдар Гибатдулин (Калининăри шкул-интернат). Хăйсен çитĕнĕвĕсене бронза медальпе пуянлатнисем – Никита Федоров (1-мĕш шкул), Денис Павловпа Леонардо Семенов (2-мĕш шкул) тата Санарпуçĕнчи шкулта вĕренекен Диана Яковлева.
Çапла майпа район команди иртнĕ çулхи пекех пĕтĕмĕшле иккĕмĕш вырăна тухнă, канашсенчен 2 очко кăна сахалрах пухнă.
Кĕрешÿçĕсене ку спорт тĕсĕн вăрттăнлăхĕсене туптама пулăшаканĕсем, çĕнтерме хавхалантараканĕсем – Сергей Васильев, Виталий Трофимов, Юрий Львов, Андрей Воробьев пултаруллă тренерсем.
И.ЯКОВЛЕВА.