16 декабря 2013 г.
Николай Федотович Афанасьев Кÿстÿмĕр ачисене иккĕмĕш çул волейбол ăсталăхне хăнăхтарать. Тренировкăсене Вăрнартан яла çÿреме тивет, анчах та çакă пăшăрхантармасть тренера. Вĕренекенсем кăтартусемпе савăнтарни çунат хушать ăна.
Кăçал акă Кÿстÿмĕрти шкулта вĕренекен арçын ачасем пуçласа волейбол лигинче çĕнтерчĕç. Район чемпионачĕпе пĕрле иртнĕ турнирта шкул чысне Дмитрий Якушин, Василий Антипов, Алексей Горшков, Александр Иванов, Дмитрий Быков, Виктор Васильев, Андрей Картузов тата Святослав Соярков хÿтĕленĕ.
Унччен маларах ку шкулăн хĕрсен команди районта виççĕмĕш пулнăччĕ.
Волейболăн шкул лигине пурĕ вун пилĕк команда хутшăннă. Финалта кÿстÿмĕрсемпе Вăрнарти 1-мĕшпе 2-мĕш тата Санарпуç шкулĕсен командисем тупăшнă.
Çĕнтерÿçĕсен умра тата та яваплăрах вăйă – çывăх вăхăтра вĕсен район чысне республикăра хÿтĕлеме тивĕ.