09 декабря 2013 г.
Чăннипех те çапла калама пулать «Химик-Августăн» ăста футболисчĕ Роман Шалин пирки. Ун шутĕнче 60 ытла тапса кĕртнĕ гол. Командăн чи ăста бомбардирĕ.
Кăçалхи футбол сезонĕнче вăйă вăхăтĕнче суранланнине пула туллин выляман пулин те кăтартусемпе савăнтарма пултарчĕ. Чăваш ен Кубокĕшĕн финал умĕнхи вăйăра вăл пенальтипе тапса кĕртнĕ мечĕк татса паракан очко пулчĕ. Пĕлетпĕр ĕнтĕ, августра «Химик-Август» ку турнирăн çĕнтерÿ паллине саккăрмĕш хут çĕнсе илчĕ. Кунта, паллах, Роман Шалинăн тÿпи те çав тери сумлă.
Йывăр сурана пулах унăн «Приволжье» футбол пĕрлешĕвĕн Кубокĕн пĕрремĕш çаврăмне сиктерме тивнĕ, анчах та сывлăхне çирĕплетнĕ хыççăн «Чувашия-ДЮСШ» командин йышĕпе вăл финалăн пĕрре-тăваттăмĕш пайĕнче тĕлĕнтерме пултарчĕ: Ульяновскри «Волга-ДЮСШ» командăпа иртнĕ тĕл пулура арбитрăн финал шăхличĕ янăриччен икĕ минут маларах гол тапса кĕртнĕ.
Октябрь пуçламăшĕнче Чăваш ен чемпионачĕн финалĕнче те Романăн шутне тепĕр гол çырăннă: «Динамо» хапхине вăл мечĕке пуçпа тĕртсе кĕртнĕ. Шел те, ку очко маларахри çулхи çитĕнĕве сыхласа хăварма май паман. Шупашкар футболисчĕсем вăйă вĕçлениччен шута икĕ очко таран ÿстернĕ. «Химик-Августăн» кĕмĕл-вырăнпа çырлахма тивнĕ.
Вăрнар каччин футболти «çăлтăрлă» çулĕ ачаранах хывăннă. Кил хушшинчи вăйăсенчех унра лидер туртăмĕ пуррине, тĕллевсене çирĕп пурнăçланине пĕр калаçура çак турнирсен йĕркелÿçисенчен пĕри, халĕ «Энергостроймонтаж» тулли мар яваплă общество ертÿçи Рифкат Киметов та палăртнăччĕ.
«Химик-Август» команда йышĕпе аслă ачасем хушшинче республикăн бронза призерĕ пулнă. Тĕп командăра выляма пуçланă хыççăн виçĕ хутчен Чăваш ен чемпионĕ пулнă, Чăваш Республикин Кубокĕн темиçе хутчен, Суперкубок çĕнтерÿçи. Виçĕмçул акă республика чемпионачĕн аслă дивизонĕнче çĕнтерÿллĕ 40 голран вуннăшне вăл тапса кĕртнĕ. Иртнĕ çулхи Чăваш ен Кубокĕн чи лайăх бомбардирĕ...
Вырсарни кун Вăрнарти физкультурăпа спорт комплексĕнче иртнĕ «Футбол – больше, чем игра» уявра ахальтен мар вăл тĕп хăнасен йышĕнче пулчĕ. «Химик» спорт клубĕн председателĕ, «Химик-Август» команда начальникĕ Евгений Захаров Роман Шалин паян Вăрнар футбол аталанăвĕн тĕп шăнăрĕ пулнине палăртрĕ, çамрăк футболистсене ун пекех çивĕч, тĕллевлĕ пулма ыйтрĕ.
Роман Шалин çитĕнекен спортсменсене çĕнтерÿ патне чунтан ăнтăлма суннă хыççăн чи пултаруллисене чыслас саманта та хутшăнчĕ. Ачасене ун аллинчен медальсем, статуэткăсем илме уйрăмах пĕлтерĕшлĕ пулчĕ.
С.ЧИКМЯКОВА.
Р.Шалинпа (сулахайри) Е.Захаров Михаил Куприянов çамрăк футболиста Дипломпа чысланă самант.