09 декабря 2013 г.
Явăшсен тăрăхĕнче 496 хуçалăх. Çыхăну уйрăмĕнчи ялсене 586 экземпляр тĕрлĕ йышши хаçат-журнал килсе тăрать. Вăл шутран «Çĕнтерÿ çулĕ» – 123 экземпляр. Почтальонсем 2014 çулăн пирвайхи çур çулĕшĕн пичет изданийĕсене сарассипе куллен тимлĕ ĕçлеççĕ.
Кашни кил хаçат-журналпа туслă пултăр, унăн ăс-хакăлĕпе туллин усă куртăр тесе Мăн Явăшăн пĕрер çухрăма тăсăлакан çичĕ урамĕ тăрăх тулли сумка йăтса çÿрекен Татьяна Александровна Алексеева почтальонка нумай вăй хурать. Ырă туйăмлă, ăшă туртăмлăскер, ял-йыша район хаçачĕпе яланлăхах туслаштарасшăн. Çырăнтару тапхăрĕнче çынсемпе тĕл пулса калаçма тăрăшать, «Çĕнтерÿ çулĕ» çырăнса илме хавал парать. Çитес çулшăн район хаçатне 61 экземпляр çырăнтарма ĕлкĕрчĕ. Пĕлтĕрхинчен ытларах сарасшăн.
Уйкас Явăшри Марианна Ястребова почтальонка та пичет изданийĕсене иртнĕ çулхинчен нумайрах сарма тĕллев тытрĕ. Палăртни ăнăçлă пурнăçланса пырать. Паянхи кун тĕлне центрта, республикăра тата районта тухса тăракан хаçат-журналсене 100 экземпляр ытла çырăнтарчĕ. Вăл шутран – «Çĕнтерÿ çулĕ» 28 экземпляр. В.Трофимов 7 тĕрлĕ хаçат-журнал çырăнчĕ. Н.Ильинпа М.Викторова çитес çулта тăватшар экземпляр илсе тăрĕç. «Мураты» ял хуçалăх предприятийĕн ертÿçисем выльăх-чĕрлĕх фермисенче тата уй-хирте хастар ĕçлекенсене хуçалăх шучĕпе тÿлевсĕр хаçат-журнал çырăнса парассине йăлана кĕртрĕç. Çитес çул Уйкас Явăшри сĕт-çу ферминчи 10 çын тĕрлĕ йышши хаçат-журнал илсе тăрĕ.
Çăкаллă Явăшри çынсем 2014 çулăн пирвайхи çур çулĕшĕн хаçат-журнал йышлăн çырăнаççĕ. Наталия Михайловна Васильева почтальонкăн тÿпи пысăк. Ĕçе анчахрах кÿлĕннĕскер, район хаçатне ытларах сарассипе палăрчĕ. Эрне хушшинче «Çĕнтерÿ çулĕ» 7 çынна çырăнтарма ĕлкĕрчĕ. Çитес çул А.Константинова, Т.Петрова, Т.Смирнова, Г.Владимирова «Çĕнтерÿ çулне» киленсе вулĕç.
– Хаçат-журнал пĕлтерĕшĕ пысăк, вăл кирек-камшăн та усăллă, ун урлă мĕн пур хыпарсене пĕлсе тăратпăр. Халĕ пирĕн тăрăхри килсене вăтамран пĕрер экземпляр ытла хаçат-журнал килсе тăрать пулсан, çитес çулта çак кăтарту чакмĕ, – çирĕп шантарса каларĕ çыхăну уйрăмĕн начальникĕ Светлана Аршуткина, çырăнтару ĕçĕнчи ÿсĕмсемпе паллаштарнă май.
В.МОСКВИН.