04 декабря 2013 г.
Вăрнарти почта уйрăмĕнче 9 участок. Тăхăр почтальон кунсерен ир-ирех хăйĕн тивĕçне пурнăçлама тытăнать. Раççей тата республика хаçат-журналĕсемсĕр пуçне районти «Çĕнтерÿ çулне» те çынсене вăхăтра çитерсе пама васкаççĕ. Почтальонсем каланă тăрăх, 2014 çулхи январĕн 1-мĕшĕнчен илсе тăма «Çĕнтерÿ çулне» пенсионерсем кăна мар, çамрăксем те чылайăн çырăнаççĕ. Хăшĕ-пĕри, чăн та, хаçатра реклама, пĕлтерÿ нумаййишĕн пăшăрханать. Анчах хальхи пурнăçра вĕсемсĕр те май килмест-çке...
Почтальонсем каланă тăрăх, район администрацийĕнче, акă, халлĕхе район хаçатне çиччĕн çырăннă, çавăн пекех казначействăра, ял хуçалăх банкĕнче «Çĕнтерÿ çулĕпе» туслисен йышĕ сахал. Танлаштарма: «Вăрнарти хутăш препаратсен завочĕ» цехсенче вулама 20 экземпляр, «Вурнарская» МСО 22 экземпляр çырăннă.
Саккăрмĕш участокри Е.Скворцова почтальон акă мĕн каласа кăтартрĕ:
– Кăçал район хаçатне участокри 119 килте илсе тăраççĕ. Çĕнĕ çултан вĕсен шучĕ тата ытларах пуласса шанатăп. Анчахрах пирĕн эрне варринче канмалла пулса тухрĕ. Çавăнпа «Çĕнтерÿ çулне» вулакансем патне çав кунах çитерме май килмерĕ. Тепĕр кунне сакăр вуннăран иртнĕ Е.Яковлева хапха умĕнче кĕтсе илчĕ: «Лена, чирлемерĕн пулĕ те, кунĕпех кулянса çÿрерĕм. Мĕншĕн килмерĕ-ши ку тетĕп. «Çĕнтерÿ çулне» çывăх тăвана кĕтнĕ пекех кĕтетĕп те темĕн çитмен пекех туйăнать...».
Поселокра район хаçатне вулакансен йышĕ çуллен хушăнса пыни паха. Ултă-çичĕ çул каялла ăна икçĕр ытларах килте илсе тăнă пулсан, халĕ çичçĕртен иртнĕ.
В.АЛЕКСАНДРОВА.