04 декабря 2013 г.
Шăматкунхи хаçатра Чăрăшкас Мăратри Н.Викторовăн çырăвне вуланă хыççăн чун чăтмарĕ, хамăн шухăша пĕлтересех килчĕ. Вулакан ялсемпе вулакан район тума пултарăпăр-ши; Паллах, çак ĕмĕте пурнăçлама пулать. Анчах чи малтан пуçлăхсен, депутатсен, ял-хула поселенийĕсенче, шкулсенче, садиксенче, культура учрежденийĕсенче ĕçлекенсен, пĕр сăмахпа, харпăр хăйне интеллигентсен шутне кĕртекенсен, пуçаруллăрах пулни кирлĕ.
Акă пирĕн ял тăрăхĕн (хамăн ята-шыва, ăçта пурăннине кăтартмастăп) пуçлăхĕ те, ун çумĕнче ларакансенчен пĕри те «Çĕнтерÿ çулне» çырăнса илменнине лайăх пĕлсе тăратăп. Пирĕн тăрăхри пĕр-пĕр кăлтăк-айăп пирки мĕн те пулин пичетленсен пуçлăх хайхи хаçата тупса килсе пама ыйтать. Хăш-пĕр вĕрентекенсем те периодика изданийĕсемпе туслă мар. Çакă пирĕн патра кăна-ши;
Район хыпарçине эпĕ çур ĕмĕре яхăн сиктермесĕр илсе тăратăп.
Хаçат тусĕ.