29 ноября 2013 г.
Сочире иртекен хĕллехи Олимп вăййисем пуçланас вăхăт çывхарса пырать. Кунти объектсене тунă çĕрте Хирпуç ялĕнчи маттурсем те ĕçлерĕç. Пултаруллă, ĕçрен хăраман аптрамансем Вячеслав Григорьев, Михаил Волков, Валерий Николаев, Эдикпа Юрий Александровсем Сочипе Адлер хушшинче чугун çул кĕперĕсем, автоçулсем тунă çĕрте вăй хунă. Миша Волков икĕ вăхăта ĕçленĕ, ыттисем – вĕçне çити. Вячеслав Григорьевпа калаçса илтĕм. Вăл 2012 – 2011 çулсенче вахта мелĕпе Сочире ĕçленĕ. Каннă вăхăтра Хура тинĕсре шыва кĕнĕ, ку тăрăхри паллă вырăнсенче пулса курнă.
Чи пысăк объект – Адлер çумĕнчи Мăн Херота юхан шывĕ урлă кĕпер хывнă, хыççăн çырансем ишĕлесрен тата тусем çинчен анакан шывсемпе чулсем ишессинчен хÿтĕлекен çÿллĕ монолит стенасем хăпартса çирĕплетнĕ çĕрте тăрăшнă. Унсăр пуçне вăл автоçулсем çинче темиçе кĕпер хывнă çĕрте ĕçленĕ. Халĕ Мускав тавра хывнă автоçул çинче развязкăсем тунă çĕрте тимлет. Яла час-часах килсе çÿрет. Мăшăрĕ Ирина Вăрнарти çĕвĕ фабрикинче ĕçлет, çемьере ывăлпа хĕр ÿсеççĕ.
Сочире ĕçлени – ĕмĕрлĕхе, ачисемпе пулас мăнукĕсемшĕн те аса илсе мăнаçланмалăх, тен, çав вырăнсене çитсе те курĕç-ха.
Сочири Олимп вăййисен объекчĕсене тунă çĕрте хирпуçсен тÿпи те пурри пире савăнтарать. Телейлĕ çÿрĕр, чипер таврăнăр, сывлăхлă пулăр.
И.ФЕОФАНОВА.
Хирпуç.