29 ноября 2013 г.
Кăçалхи кĕрхи призывра Вăрнар районĕнчен 70 енне каччă салтак тумне тăхăнĕ, пирĕн анлă çĕршывăн тĕрлĕ кĕтесĕнче хÿтĕлевре тăрĕç вĕсем. Хальлĕхе 17 призывник служба вырăнĕсене тухса кайнă.
Ку призыв кампанийĕ унчченхисенчен нимĕнпе те уйрăлса тăмасть. Ашшĕ-амăшĕсен хăйсен ывăлĕсем тĕлĕшпе йышăну кăларакан комисси ларăвĕсене хутшăнма право пур. Ывăлне ăçта янине эрне хушшинче пĕлтереççĕ. Эшелонра е самолетра пушă вырăн пур-тăк ашшĕ-амăшĕ служба вырăнне çитиччен пĕрле пыма та пултараççĕ. Мăшăрлă, ача-пăчаллă, ашшĕ-амăшĕ чирлĕ е пенсие тухнă призывниксене халĕ, тĕпрен илсен, пурăнакан вырăнпа çывăх чаçсене яма тăрăшаççĕ.
Анчах ку призывра çĕнĕлĕх те кĕртнĕ: документсен яланхи пуххипе пĕрле призывниксен хăйсен фотоархивне хатĕрлемелле.
Шел те, çар тивĕçĕнчен пăрăнакансем те сахал мар районта. Çĕршыва хÿтĕлеме каяс теменнисем Санарпуç, Мăн Турхан тата Çавалкас ял поселенийĕсенче нумайрах. Аçăмçырми тата Ярмушка ял поселенийĕсенче ĕçе çÿллĕ шайра йĕркеленине уйрăммăн палăртмалла. Хальхи вăхăтра район прокуратури çамрăксем çара каяссинчен пăрăннă тĕслĕхсене тĕрĕслессипе тата вĕсене саккунпа килĕшÿллĕн явап тыттарассипе ĕçлет.
Юлашки çулсенче аслă пĕлÿ илнĕ призывниксем ытларах та ытларах çĕршыв хÿтĕлевçисен ретне тăни сисĕнет. Аслă шкул дипломĕллĕ çамрăксем кăткăс çар специальноçĕсене те кĕске вăхăтрах алла илме пултараççĕ. Вăрнар тăрăхĕнчи яшсем çарта хăйсен служба тивĕçĕсене тĕслĕхлĕ пурнăçлани пирки пĕлтерсе вĕсен чаçĕсен командирĕсем района тав çырăвĕсем яни те питĕ кăмăллă.
Нумаях пулмасть акă тăван киле салтакран Пуканкассинчи Павел Петров таврăнчĕ. Маттур çамрăк РФ Федераллă хурал службин Мускаври Кремль комендатурин Президент полкĕнче службăра тăма тивĕçнĕ. Пирĕн çамрăксем – пирĕн мухтав.
В.ВЕНЕДИКТОВ,
ЧР çар комиссариачĕн Йĕпреç тата Вăрнар районĕсенчи пайĕн пуçлăхĕ.