29 ноября 2013 г.
Раштавăн 6-мĕшĕнче районти «Вăрнарьен» халăх хорĕн 20 çулхи юбилейĕ. Çак коллектива тахçантанпах лайăх пĕлеççĕ. Вăл çуллен çурхи ĕçсем вĕçленнĕ хыççăн ирттерекен ĕçпе юрă уявĕ – Акатуй сцени çине тухать, ялсене, юнашар районсене кайса çÿрет. 1990 çулта чăмăртаннă. 1993 çулхи нарăс уйăхĕнче ăна «Ветерансен халăх хорĕ» ятпа чысланă. Пуçарса яраканĕсем тата йĕркелесе пыраканĕсем А.И.Юдин, В.П.Слотина, В.П.Наумов (вăл ун чухне район администрацийĕн пуçлăхĕ). Н.А. Долгов юрăпа ташă ансамбльне ертсе пынă май, халăх хорне нумай пулăшрĕ. Ветерансен халăх хорне 2010 çулран пуçласа Елена Матвеева ертсе пырать. Баянисчĕсем – В.Семеновпа В.Кудрявцев. Çак хушăра икĕ хутчен «халăх» тенĕ ята çĕнĕрен хÿтĕленĕ. Хор репертуарĕ пуян. Чăваш тата вырăс халăх юррисем. Паллă-чаплă композиторсем çырнисем. Культура çуртĕнче иртекен уявсене яланах хутшăнать. Районти смотр-конкурссенче те юрлать. Халăх хорĕн ушкăнĕ хăйсен концерчĕсене республика анлăшĕнчи «Çавалпа Сăр тăрăхĕнче», «Çĕр пин юрă çĕршывĕнче» фестивальсенче кăтартнă, «Чун юрланă чух» ушкăнсемпе Канаш хулипе районĕнче, Тăвай, Йĕпреç районĕсенче пулнă. Жюри вĕсен пултарулăхне пысăка хурса хакланă.
Паянхи куна юрлама юратакансем, «Вăрнарьен» халăх хорне çÿрекенсем чылайăн: З.Белякова, Т.Курсова, Г.Петрова, А.Печкина, Р.Тихонова, С.Маслячкина, Г.Емельянова, А.Ягушова, И.Артемьева, Т.Терентьева, З.Григорьева, Р.Сорокина, А.Львова, В.Авруйская, В.Архипова, А.Филимонова, В.Семенов, Ф.Быков, Е.Алексеев, Г.Афанасьев, В.Сухарев, А.Терентьев, Р.Малышева, И.Чугунников, Г.Куркин, Б.Кириллов, И.Трофимов... Çак кунсенче «Вăрнарьен» пултарулăх ушкăнĕ Кивçурт Мăратра тата Пăваялĕнче концертпа пулса ял халăхне хăйсен юрри-ташшипе чылайччен савăнтарчĕ.
Хальхи вăхăтра юбилей программине хатĕрлерĕмĕр. Уява вăрнарсене пурне те чĕнетпĕр! Концерт декабрĕн 6-мĕшĕнче Вăрнарти культура çуртĕнче каçхине 6 сехетре пуçланать. Çакна та каласшăн, кăштах спонсорсем тупăнсан, пулăшсан аванччĕ.
Е.ГРИГОРЬЕВА.