27 ноября 2013 г.
«Вурнарымежрайгаз» команди темиçе çул ĕнтĕ волейболпа республикăри газовиксем хушшинче малта. Команда хăйĕн ăсталăхĕпе Смоленск, Дон çинчи Ростов, Саратов хулисенче те тĕлĕнтернĕ, паллах, çĕнтерÿпе. Ку командăра чылай çул районта волейбол ĕмĕрне тăсас тесе чунтан тăрăшакан Владимир Иванович Иванов вылярĕ. Халĕ вăл – «Ибресимежрайгаз» ертÿçи.
Тĕрĕссипе, ку командăна пуçтараканĕ те Владимир Ивановичах. 2003 çулта организацие ĕçлеме килсен йĕркеленнĕ ушкăн. Алексей Шоркин, Николай Есенцев, Сергей Дмитриев, Вадим Кириллов, Сергей Павлов (республикăн ял хуçалăх министрĕ) ăста волейболистсем пĕрлешнĕ вăл вăхăтра командăна. Чи пĕлтерĕшли – йĕркеленнĕренпе спортсменсем призлă вырăнсенчен чакманни.
Ку командăри Дмитрий Паймулкин, Алексей Шоркин тата Григорий Романов – районăн пĕрлештернĕ команди йышĕнче чылай çул выляççĕ. Юлашки çулсенчи çитĕнÿпе мухтанма сăлтав пур – Вăрнар районĕ республика чемпионĕ те пулчĕ, призлă вырăнсенчен те чакмасть.
Тĕрĕссипе, Владимир Иванович çитĕнтернĕ чемпионсем йышлă. Ун патĕнче ăсталăха туптанă Дима Паймулкин паян хăй тренер – вăл хатĕрлекен хĕрсен команди районта çеç мар, республикăра та вăйлисен йышĕнче. Нумаях пулмасть ун вĕренекенĕсем Чăваш ен первенствин çурма финалне тухрĕç.
Вăрнар волейболисчĕсен тĕп шăнăрĕ шутне Владимир Иванович çавăн пекех Алексей Лаврова, Вадим Кириллова, Дима Трофимова, хĕрсенчен Марина Паймулкинана, Настя Кириллована, Ирина Трофимована, Мария Мефодьевана кĕртет. Çамрăксенче шанăç пуррине те çирĕплетет: Андрей Алексеев, Игорь Шашков, Артем Степанов, ыттисем.
Районăн спорт юхăмĕн аталанăвне пысăк тÿпе хывнă тата хывакан Владимир Иванович спортпа туслă çынсем ĕçре те, вĕренÿре те ĕлкĕрсе пынине палăртать. «Вĕсем кирек мĕнле коллективра та çухалса каймаççĕ, мĕншĕн тесен спорт ушкăнпа ĕçлеме хăнăхтарать», – тет тренер. Çакнашкал çамрăксем пурри коллективсенче ĕçпе спорта юнашар тăратма пулăшать, тесе хушса хурать.
Хăй вăл кирек ăçта ĕçлесен те сывă пурнăç йĕркине малти вырăна кăларнă. Вăрнарти 29-мĕш училищĕре професси вĕрентĕвĕн мастерĕнче тимленĕ вăхăтра В.Иванов тавра ăста спортсменсем пуçтарăннă, кунти команда та районта яланах малта пынă. «Сельхозхиминчи» команда тата; Владимир Иванович хăй ĕçленĕ вăхăтра унта та вăйлă ушкăн йĕркелеме пултарнă.
«Вурнарымежрайгаз» ĕçченĕсене илес пулсан, вĕсем те хăйсен отраслĕн спартакиадинче волейболсăр пуçне йĕлтĕрпе, çуран чупассипе пĕрре мар малти вырăнсене тухса хаклă парнесене тивĕçнĕ.
Пĕлтĕр Чăваш ен газовикĕсем хушшинче хĕллехи спартакиадăра «Вурнарымежрайгаз» команди пĕтĕмĕшле кăтартупа виççĕмĕш вырăн йышăннăччĕ. Ишессипе – бронза призерсем пулса тăнăччĕ. Унччен маларах çуллахи спартакиадăн кубокне çĕнсе илнĕ.
C.ЧИКМЯКОВА