15 ноября 2013 г.
Статистика тĕпчевĕсем тăрăх, 2012 çулта Раççей çыннисен 34 проценчĕ пĕр
кĕнеке те, вăл шутра электронлине те, вуламан. Çак цифра çулсеренех ÿссе пырать.
Çавна май кĕнеке лавккисен шучĕ чакать – паянхи куна çĕршывра вĕсем 3000 яхăн
çеç.
Çакăн пек цифрăсем илсе кăтартнă Раççейĕн наци республикисен кĕнеке
издательствисен ертÿçисем Шупашкарта иртнĕ семинарта. Ăна Раççей пичечĕ, Чăваш
ен информаци политикин министерстви тата Чăваш кĕнеке издательстви пулăшнипе
кĕнеке кăларакансен «АСКИ» ассоциацийĕ йĕркеленĕ. Унта çĕршыври нумай наци
представителĕсем, кĕнеке издательствисен директорĕсем, регионсенчи
министерствăсемпе департаментсен, Раççей кĕнеке палатин тата Мускав патшалăх
пичет университечĕн ĕçченĕсем пухăннă.
«Кĕнеке çинчен калас пулсан, эпир чи малтан вăл çыннăн пĕлĕвне, культура
аталанăвне палăртнине ăнланатпăр», – тенĕ семинара уçнă май, Чăваш ен
премьер-министрĕ Иван Моторин. Вăл çынсене кĕнекен пурăнмаллине, вăл çыннăн
пурнăçĕнче яланах пулмаллине тата вулакан патне çĕнĕлле çулсем шырамаллине
палăртнă. Вăхăт, çынсем, çамрăксем улшăнаççĕ, çавăнпа та кĕнеке кăларакансен те
çак вăхăта пăхăнмалла, тенĕ вăл.
Чăваш ен информаци политикин министрĕ Валентина Андреева издательсем паян çав
тери кирлĕ те пĕлтерĕшлĕ ĕç тунине каланă. «Пысăк хăвăртлăхпа аталанакан
информаци технологийĕсем пĕр шелсĕр хут кĕнекесен конкуренчĕ пулса тăчĕç.
Кĕнекен хăй хаклăхĕ чакмасть, вулакансем вара ăна хаклăпа туянасшăн мар, çавăнпа
та нумай чухне электронлă кĕнекесене вулаççĕ. Анчах çынсем хут кĕнекене те
вулама пăрахман, çавăнпа та издательсен технологи революцийĕн авăрĕнче вырăн
тупмалла», – палăртнă министр.
Республикăра наци чĕлхипе кăларакан кĕнекесен шучĕ ÿссе пырать. 2011 çулта
170 тухнă пулсан, 2012 çулта – 197. Республика писателĕсене тата ытти
регионсенчи авторсене явăçтарас тĕллевпе Чăваш ен Министрсен Кабинечĕ ачасемпе
çамрăксем валли чăвашла çыракансем валли грант та çирĕплетнĕ. Пĕлтĕр унта 17 ал
çырăвĕ хутшăннă, кăçал – 27. Конкурсра çĕнтернисен кĕнекисем пичетленсе тухнă
ĕнтĕ.
Кĕнеке кăларакансен «АСКИ» ассоциацийĕн ертÿçи Константин Чеченев пĕлтернĕ
тăрăх, совет тапхăрĕнче пĕр çын пуçне 12 кĕнеке тивĕçнĕ, халĕ – 4-а яхăн. Çапах
та Раççей кĕнеке чи нумай кăларакан пилĕк çĕршыв йышне кĕрет. Вăтам тираж – 4600
экземпляр.
Регионсенчи издательствăсен аталанăвне Чăваш кĕнеке издательствин директорĕ
Валерий Комиссаров та çирĕплетнĕ. Вулакансен йышне чакарас мар тесе,
издательство час-часах çĕнĕ кĕнекесен презентацийĕсене, авторсемпе тĕл пулусем,
конкурссем, телевиденипе, радиопа передачăсем йĕркелет. «Тантăш» хаçатра «Вулав
тĕнчи» страница тухать. Кăçалхи 9 уйăхра 85 кĕнеке кăларнă, 52 ятпа социаллă
пĕлтерĕшлĕ литература пичетленсе тухнă.
Семинарта çавăн пекех регионсенчи кĕнеке издательствисен ертÿçисем те тухса
каланă.