06 ноября 2013 г.
– Мăн Явăш шкулĕ маншăн иккĕмĕш кил вырăннех. 39-мĕш çул çак шкула чарăнмасăр, такăнмасăр сехет çине пăхса чупатăп. Кунта эпĕ районти вĕрентÿ пайĕн пуçлăхĕ Вячеслав Пантелеймонович Тихонов сĕннипе килнĕ. Вĕрентÿ пайĕнчех Анна Степановна Федоровăпа паллашрăмăр. Кайран унпа пĕрле ĕçлерĕмĕр.
Çитрĕм шкула. Учительсем ирех пухăннă. Паллашрăмăр: Мария Яковлевна, Антонина Павловна, Евдокия Семеновна, Татьяна Сергеевна, Зинаида Никоновна, Мария Яковлевна, Нина Егоровна... Пурте паянхи пек куç умĕнче. Чăлт шурă кофтăсемпе, хура сарафансемпе. Кĕçех директор Никон Андреевич Андреев килсе кĕчĕ. Маттур. Çÿллĕ. Хитре арçын. Мана 30 урок ытла парасшăн. Нимĕç чĕлхи урокĕсене те сĕнет. Вăл вăхăтра шкулта 500 ача вĕренетчĕ. Кашни класра 30-ăн е ытларах та. Владимир Иванович Толстов мана валли хваттер хатĕрри çинчен пĕлтерчĕ. Тĕлĕнмелле лайăх çынсемпе ĕçлерĕмĕр. Ачасем ларма-тăма пĕлмен. Уроксене хатĕрленнĕ чух пушă вăхăт ан пултăр тесе тăрăшнă. Кашни тунти кун Никон Андреевич канашлу иртеретчĕ. Камăн урок япăх иртнĕ; Ăçта мĕн пулнă; Кашни тунти кун филиалти учительсем Мăн Явăша килетчĕç: А.С.Петрова, Ф.Г.Григорьева, Л.М.Лаврентьева, Н.И.Филиппова. Питĕ тăрăшуллă, тирпейлĕ çынсемччĕ. Василиса Аркадьевна тума пĕлмен ĕç çукчĕ. Вăл аслă вожатăйра ĕçлетчĕ. Ÿкерме, юрлама, ташлама питĕ ăстаччĕ. Вăл вăхăтра каçхи шкул та ĕçлетчĕ. Кунĕпех шкулта кунланă: ирхине – уроксем, унтан – вăрăмлатнă кун йĕркинчи группăра уроксем, вара – каçхи шкул. Тулли пурнăçпа пурăннă. Халăх хушшинче пулма тăрăшнă.
М.Петрова.