30 октября 2013 г.
Мускаври çулленхи «Ылтăн кĕркунне» куравра Иван Михайлович кăçал виççĕмĕш хут пулнă. Пирĕн республикăри агропромышленноç комплексĕн предприятийĕсем унта пахалăх конкурсĕсене пилĕк номинаципе вăтăрăн ытла хутшăннă, тĕрлĕ продукцин 54 тĕслĕхĕпе паллаштарнă. Курав Ял хуçалăх ĕçченĕсен кунĕ ячĕпе юпа уйăхĕн 9–12-мĕшĕсенче иртнĕ. И.М.Федоров хальхинче икĕ кунлăх конкурсра (10–11-мĕшсенче) хурт-хăмăр ĕрчетессипе хăй мĕнле ĕçлени çинчен каласа кăтартнă, сăмахне фотодокументсемпе, ытти материалсемпе çирĕплетме май тупнă. Ăна «Чи лайăх хресчен фермер хуçалăхĕ» конкурсăн кĕмĕл медалĕпе наградăланă. Дипломне РФ Ял хуçалăх министрĕ Н.В.Федоров тата Мускав мэрĕ С.С.Собянин алă пуснă.
–Мускаври «Ылтăн кĕркунне» куравне эпĕ унчченхи çулсенче те кайнă, анчах конкурсра кăçал пĕрремĕш хут пултăм,– тет Иван Михайлович.– Çитес конкурсра хурт-хăмăр продукчĕсен тĕслĕхĕсене кăтартас тетĕп.
И.М.Федоров хурт-хăмăр ĕрчетессипе 2000-мĕш çултанпа тимлет. Чăрăш Ишекрен вăл. Шĕнер таврашĕнче пархатарлă çак ĕçпе чăрманакан нумай. Ĕмĕтленнĕ профессие алла илмешкĕн Иван Михайлович Хусанти ветеринари медицинин академинче ятарласа вĕреннĕ. Малтан Вăрнарти ветстанцире ĕçленĕ. Унтанпа вун виçĕ çул районта хурт-хăмăр ĕрчетес енĕпе зоотехникра вăй хучĕ. Çирĕм-вăтăр çынна утар тытма явăçтарчĕ. Хăй те ăсталанса пычĕ. Юлташĕсене сĕнÿ-канашпа та, литературăпа та пулăшма хапăл. 2010 çулта хăй тĕллĕн ĕçлеме хресчен фермер хуçалăхне йĕркелерĕ.
Мускаври кăçалхи выставкăран чăвашсем 11 ылтăн, 7 кĕмĕл, 13 бронза медальпе таврăннă. Ылтăнлисенчен пĕри – паллă хурт-хăмăр ăсти, Шупашкар районĕнчи Урай Макаç ялĕнче пурăнакан Христофор Макарович Макаров. Куравра октябрĕн 9-мĕшĕнче ун патĕнче РФ Премьер-министрĕ Д.А.Медведев чарăнса тăнă, сумлă ветеранпа самай вăхăт калаçнă, пыл хурчĕн çимĕçĕсемпе интересленнĕ. Кайран Макаровсем патне киле çыру ярса ĕçчен çемьене тепĕр хут тав туса саламланă.
– Христофор Макаровичпа Мускавра октябрĕн 11-мĕшĕнче паллашрăмăр,– тет Иван Михайлович.– Ĕçлĕ çыхăнусем малалла аталанасса кĕтетпĕр. Хальхинче эп Премьерпа калаçаймарăм. Çитес конкурсра, тен, Президентпа тĕл пулса алă тытма май килет...
«Ылтăн кĕркунне-2013» выставкăра куракансене тĕллĕн илĕртсе хăнана чĕнме пултарнисем хушшинче вăрнарсем татах пулнă. ООО «Вăрнарти аш-какай комбиначĕ» (Василий Алексеевич Попов) тăватă тĕрлĕ продукци пахалаттарнă. Пĕрне ылтăн медальпе, теприне бронза медальпе чысланă.
М.ВАСИЛЬЕВ.