30 октября 2013 г.
И.В.Алексеев художник çинчен эпĕ халĕччен нимĕн те илтмен. Хаçатран иртнĕ шăмат кун пĕлтĕм («Хыпар», 206–207 "". Роза Власова – «Сăрă ăстин хăйне евĕр юрри»). Санарпуçне юлташ патне шăнкăравларăм. Пĕрлешсе кайнă икĕ ялтан художник тухнине-пуррине вăл та калаймарĕ. Пуçра каллех шухăш вĕçрĕ: «Кирлех пире паллă çынсене пĕр тĕпелте пуçтарнă кĕнеке». Иван Васильевич Алексеев район энциклопедине кĕмелли çын.
Вăл Çĕньял Хапăсра 1948 çулта юпа уйăхĕн 29-мĕшĕнче çуралнă. Мускавра искусствăсен Н.К.Крупская ячĕпе хисепленекен халăх университетне пĕтернĕ. Предприятисемпе учрежденисене, шкулсемпе музейсене илемлетме хастар хутшăннă. «Хатĕр пул», «Ялав», «Тăван Атăл» журналсемпе туслă ĕçленĕ. В.Харитоновăн «Атăльенсем – телей çыннисем», В.Петровăн «Улăппа пăши», Н.Петровскин «Янравлă тÿпе», Ф.Лукинăн «Юррăмпа саламлатăп», Р.Шевлепин «Йытă куççулĕ», И.Вутланăн «Ытла та вăрттăн юрату», Г.Орловăн «Ирхи йĕрсем» кĕнекесене капăрлатнă. Портретсем, натюрмортсем ÿкерет, скульптурăсем ăсталать. Ывăлĕ те, Алексей, художник, дизайнер. И.В. Алексеев халĕ Çĕньял Хапăспа çыхăннă ÿкерчĕксен ярăмне хатĕрлет. Выставкине хамăр патрах – ялта е Вăрнарта курасчĕ. Культурăпа вĕрентĕвĕн вырăнти çыннисем ачасене, ялйыша Роза Власова çырнипе паллаштарсан тата художникпе çыхăну пуçарсан аванччĕ. Иван Васильевича 65 çул тултарнă ятпа саламлатпăр.
М.ВАСИЛЬЕВ.