28 октября 2013 г.
Ялта ăна пурте Валя тесе чĕнеççĕ.
Валерия Ивановна Васильева (хĕр чухне Мострова) 1938 çулхи апрелĕн 17-мĕшĕнче Мăн Явăшра çуралнă, кăçал 75 çулхи юбилейне паллă турĕ. Тирпейлĕ тăпăл-тăпăл хитре хĕрарăм. Правительство ăна икĕ хутчен «Ача амăшĕн мухтавĕ» орденпа наградăланă. Ĕç ветеранĕ. 15 ача амăшĕ. Волонтерта пурăннă, фермăра ĕнесем пăхнă, Вăрнара сĕт турттарнă. Çавăнта «Победа» колхозран сĕт турттаракан Матвей Васильевичпа паллашнă. Пĕр ачаллă хĕрарăм тăхăр ачаллă арçынна качча тухма килĕшнĕ. 1971 çулта Хирпуç кинĕ пулса тăнă. Çемьере 9 ача: Леня, Люда, Игорь, Таня, Тоня, Саша, Надя, Оля, Вова. Вĕсем çумне Валя хăйĕн хĕрачине Светланăна илсе килчĕ. Амăшĕсĕр тăрса юлнисем савăннă. Валя вĕсене пурне те хăйĕн вырăнне хурса пăхнă. Матвейăн арăмĕ Галина вырăсчĕ, ăна Алтай крайĕнчен тупса килнĕччĕ. Галя тĕреклĕ те патвар механизатора юратса арăм пулма килĕшнĕ. Шел те, йывăр чире пула вилсе кайрĕ, тăхăр ачине тăлăха хăварчĕ.
Матвей Васильевича ку арăмĕ тепĕр пилĕк ача çуратса пачĕ: Коля, Матвей, Валя, Вероника, Вася. Йышлă çемье пуçĕ – «Победа» колхоз механизаторĕ 1982 çулхи апрельте вăхăтсăр çĕре кĕчĕ. Çав çулах октябрьте çемье Рункă ялне пурăнма куçрĕ. Матвей Васильевичăн ашшĕ, Василий Романович Романов, манăн хунеçен тăван пиччĕшĕ, фронтра Сталинград патĕнчи çапăçура пуçне хунă. Матвей Васильевичăн ачисем пурте манăн ачамсен 3-мĕш сыпăкри тăванĕсем пулаççĕ. Анчах виççĕшĕ пирĕнпе тек çук ĕнтĕ (Игорь Волгоград облаçĕнче пурăнатчĕ, Коля чукун çул çинче бригадирта ĕçлетчĕ, Матвей Мăшавăш вăрманĕнче лесникчĕ). Кĕçĕн ывăлĕ Василий 1997 çулта Хирпуçĕнчи вăтам шкултан вĕренсе тухрĕ (ун чухне пирĕн вăтам шкулччĕ), Рункăри тĕп килте пурăнать, Мускава ĕçе çÿрет, арăмĕпе тăватă ача ÿстереççĕ, çитес çулта хăйсен вăйĕпе çĕкленĕ икĕ хутлă çĕнĕ çуртне пурăнма куçасшăн.
Таньăпа Надя Рункăра çемье çавăрнă, Галя Хирпуçне, Вероника Мăн Турхана качча тухнă, Людăпа Вова КамАЗпа ĕçлеççĕ, Вова Братск хули çывăхĕнче ял администрацийĕн пуçлăхĕ. Оля Волгоград облаçĕнчи ялта клуб заведующийĕ. Светлана Иваново облаçĕнчи колхозра дояркăра ĕçленĕ, халĕ пенсире, унăн ултă ача. Ĕçрен хăраман вăл. Çамрăклах Волгоград облаçĕнче 8 çул дояркăра ĕçленĕ, Астрахань облаçĕнче пахча çимĕç пуçтарса кĕртнĕ, Волонтерта 8 çул фермăра ĕне пăхнă, Вăрнара сĕт турттарнă, «Победа» колхозра бригадăра ялан ĕçе çÿренĕ, пенсие тухсан та уй-хир ĕçне хутшăннă. Ачисене тĕрĕс пăхса ÿстернĕ, мăнукĕсене ÿстерме пулăшнă.
Валентина Ивановна Рункăра Коля килĕнче пурăнать. Унăн 38 мăнук, мăнукĕсен ачисем 20 ытла. Тав ăна пысăк чунлă, тÿсĕмлĕ, чăтăмлă пулнăшăн. Мĕн пур тăванне çирĕп сывлăх, вăрăм кун-çул сунатпăр.
И.ФЕОФАНОВА.
Хирпуç.