21 октября 2013 г.
Унăн кун-çулĕ мăнаçланмалли самантсемпе пуян. Халăх ĕçне, общество пурнăçне яланах хастар хутшăнчĕ. Çамрăкла – колхозри комсомол организацийĕн секретарĕ, Туçи Çармăсри шкулта аслă пионервожатăй. Виçĕ çул Германире – Совет Çарĕн унти ушкăнĕнче. 1-мĕш класлă специалист. Отличник. Спортсмен. Алĕç ăсти. Асăрханă ĕнтĕ, яла таврăнсан комсомолăн Вăрнар райкомне чĕнсе илнĕ. Юра Кузнецов пионерсен «Орленок» тата «Зарница» вăййисене пултаруллă йĕркелесе ертсе пынă. Ăна Пионерсен Пĕтĕм Союзри Тĕп Канашĕн, комсомол райкомĕн, обкомĕн грамотисемпе наградăланă. Кĕçех райĕçтăвкома куçарнă, кунта пай пуçлăхĕн пуканне шаннă. Ĕçри паха кăтартăвĕсене кура Шупашкара йыхравлаççĕ – Ĕç министерствин пай пуçлăхне лартаççĕ. Çав тапхăрта Шупашкарта гидроэлектростанципе хăватлă тракторсен заводне туса хута ярас ĕç-пуç анлă пынă. Юрий Петрович лара-тăра пĕлмесĕр ĕç коллективĕсене çÿренĕ, аслă стройкăсене рабочи кадрĕсемпе тивĕçтерессишĕн тăрăшнă. Çавăншăн ăна 1986 çулта «Хисеп палли» орденпа наградăларĕç.
Юрий Петрович Тимĕрçкассинче, Кузнецовсен ку таврари паллă çемйинче çуралса ÿснĕ. Шкул çулĕсенчех Суворов ячĕпе хисепленекен колхозра ĕçленĕ. Мăннисемпе пĕрле уй-хире тухнă. Выльăх апачĕ хатĕрлеме хастар хутшăннă. Весовщикра тăнă. Çак кунсенче унăн черетлĕ юбилейне паллă турăмăр. Пенсире те ĕç пăрахмарĕ орденлă юлташăмăр. Çирĕм çул ытла вăрнарсен Шупашкарти «Туслăх» ентешлĕхĕнче координаци канашĕнче активлă ĕçлет. Анчахрах Вăрнарта пултăмăр. Тимĕрçкасси тÿпинчи çăлтăра – Мĕтри Кипеке 100 çулĕ ячĕпе асăнса чысларăмăр.
С.ВАСИЛЬЕВ-САМАНТАШ.