07 октября 2013 г.
Виктор Нестерова хăй ялĕнче кăна мар, ку таврара пурте лайăх пĕлеççĕ. 50 çул ытла педагогра тимленĕ вăхăтра мĕн чухлĕ ачана ăс-тăн парса пурнăç çулĕ çине тăратнине шутласа та кăлараймăн.
Енĕшри шкултан вĕренсе тухсан, чунĕнче ача-пăчапа ĕçлес туйăм пулнăран, Патăрьелĕнчи педагогика училищине кайса кĕнĕ. Совет çарĕнче виçĕ çул службăра тăнă. Аçăмçырми шкулĕнче вожатăйра ĕçленĕ. Каярахпа тăван ялне куçать, канăва тухичченех Енĕшре математикăпа физика вĕрентет.
В.Нестеров тĕрлĕ енлĕ аталаннă çын. Уроксене ирттернипе пĕрлех ачасене шашкăлла, шахмăтла выляма хăнăхтарать, техника кружокĕсене ертсе пырать. Вĕренекенĕсем районти тата республикăри ăмăртусенче тăтăшах малти вырăнсене йышăннă. Массăллă информаци хатĕрĕсемпе ачаранах çыхăннă. Мухтава тивĕçлĕ шкул ачисем, ял хуçалăхĕнче тăрăшса ĕçлекенсем çинчен вăл çырнă заметкăсемпе статьясем, тĕрленчĕксем тĕрлĕ хаçат-журналта пичетленеççĕ.
Патшалăх ăна нумай хутчен чысланă. РСФСР çут ĕç отличникĕ. Республикăн Аслă Канашĕн Президиумĕн, РСФСР çут ĕç министерствин, комсомолăн Тĕп комитечĕн Хисеп грамотисем... Отставкăри капитан. Çарта чухне ирĕклĕрех вăхăта ахаль сая яман, хăй ирĕкĕпе çар ĕçне вĕреннĕ. Нумай пулмасть ăна Чăваш халăх ăсчахĕ («Чувашский народный академик») ятпа чысларĕç. Дипломне çапла çырнă: «Чăвашлăх ĕçне хастарлăн витĕм кÿнĕшĕн, пурнăç пахалăхне тата йăла-йĕркене упранăшăн, халăх ăс-пурлăхĕпе пĕлĕвне тăрăшса аталантарнăшăн...».
Вăл ял историне витĕмлĕн тĕпчет, çынсен ăс-хакăлĕпе тарăннăн кăсăкланать, халăхпа калаçать, патриотизма çÿлерех хăпартас пирки хăйĕн вăй-халне шеллемест. В.Нестеров пуçарулăхĕпе шкулта музей йĕркеленĕччĕ. Вĕренÿ çуртне хупнă хыççăн музейри хăш-пĕр материалсене хăй килĕнче упрать. Вĕсене юрăхсăра кăларма юрамасть.
Çемйипе татуллă. Арăмĕпе, Любовь Ивановнăпа, пĕрле учительте ĕçленĕскерпе, çур ĕмĕр ытла шăкăл-шăкăл пурăнса виçĕ ача çитĕнтернĕ. Вĕсем пурте аслă пĕлÿ илсе яваплă ĕçсенче вăй хураççĕ.
Кăçалхи çĕртме уйăхĕнче Виктор Нестерович 80 çул тултарчĕ. Пурнăç çулĕпе çирĕп утать. Вĕсен кил хушшинче тулли выльăх-чĕрлĕх, чăх-чĕп, пÿрт-çурта, тавралăха таса, тирпейлĕ тытаççĕ.
Вениамин ИВАНОВ.