07 октября 2013 г.
Нурăс–Калинино тăрăхĕ Чăваш енĕн хăйне евĕрлĕ паллă çĕрĕ-шывĕ темелле. Мăн Çавал таппин хăвачĕ ку çĕртен республикăна, Тăван çĕршыва мĕн чухлĕ ятлă-сумлă чаплă çын парнеленине шутласа та кăлараяс çук. Нурăс ен – пĕр хăйех энциклопедилле летопиç. Тава тивĕçлисем, ĕçпе вăрçă паттăрĕсем. Самана кĕнекине ĕмĕрлĕхе çырăннисем. Ученăй ятпа чапа тухнисем. Эп хальхинче кăштах хальхи çамрăк ăсчахсемпе паллаштарасшăн.
Елена Николаевна ВАСИЛЬЕВА вăтăр урлă кăна каçнă-ха. Ашшĕне пăхнă вăл, ун çулĕпе кайнă – шкул саккинченех педагог пулма ĕмĕтленнĕ. Вĕрентекенĕсенчен пĕри, Калининăри вăтам шкулăн хальхи директорĕ Татьяна Павловна Ефимова ăна хĕрÿллĕ хастарлăхне палăртса асилет. «Ман сахалтан тăватă-пилĕк чĕлхе пĕлмелле!» – тенĕ-мĕн Ленук. Вăтам шкула кĕмĕл медальпе вĕренсе пĕтернĕ. Вун çиччĕре И.Я.Яковлев ячĕпе хисепленекен Чăваш патшалăх педагогика университетне кайса кĕнĕ, 2004 çултанпа педагогика кафедрин аспирантуринче вĕреннĕ. Педагогика наукисен кандидачĕ. Ют чĕлхесемпе хытă интересленет. Акăлчан филологи кафедрин доценчĕ. 2004 çулта куçаруçă миссийĕпе Европăри спорт ăмăртăвĕсене хутшăннă. Темиçе хутчен те Чăваш Республикин Президенчĕн стипендиачĕ пулнă. Пичетленнĕ ĕçĕсем сахал мар: вĕрентÿ пособийĕсем, монографисем, статьясем т. ыт. те.
Марина Геннадьевна ВАЗАНОВА та педагогика наукисен кандидачĕ, вырăс чĕлхи кафедрин доценчĕ. Вăл та Калининăри вăтам шкула, Чăваш патшалăх педагогика университетне вĕренсе пĕтернĕ. Шупашкарти шкулсенче вырăс чĕлхи вĕрентнĕ. Педуниверситетра проректорăн наука енĕпе ĕçлекен пулăшуçи пулнă. Кандидат диссертацине 2005 çулта хÿтĕленĕ. Хĕрĕх ытла наукăпа методика ĕçĕсем çырса хатĕрленĕ, çав шутра: «Текстоорентированное обучение лексике русского языка в чувашской школе (семантико-функциональный аспект)», «Культурологический аспект обучения фразеологии русского языка в чувашской школе», «Культура тюркских народов на уроках русского языка. Пособие для учителя» т. ыт. те. Хăш пĕр ĕçĕсем Уфари, Ярославльти, Санкт-Петербургри университетсемпе издательствăсенче пичетленнĕ.
Вĕрентÿ ĕçĕн пултаруллă организаторне, паллă педагога Петр Никифорович Никифорова районта пĕлмен çын çук пулĕ. Унăн хĕрĕ Галина Петровна НИКИФОРОВА ют чĕлхесен факультечĕн преподавателĕсемпе студентсем валли наука ĕçĕсем нумай çырса пичетленипе палăрнă. Вăл, çавăн пекех, Шупашкар хулинчи çул çÿрев кĕнекисен авторĕ. Çар тематикин профессионал-куçаруçи. Юлашки вунă çул хушшинче куçаруçă миссийĕпе Германи, Австри посольствисен представителĕсемпе пĕрле ĕçленĕ, Шупашкар–Бавари хушшинчи çыхăнусен договорне хатĕрленĕ çĕре хутшăннă т. ыт. те. Калининăри вăтам шкула вĕренсе пĕтернĕ. Ултă çул учительте ĕçленĕ. Нимĕç чĕлхин факультетне тата аспирантурăна Горький хулинчи Н.А.Добролюбов ячĕпе хисепленекен институтра пĕтернĕ. Галина Петровна – «Чăваш ен – çĕнĕ вăхăт» пултарулăх конкурсĕн лауреачĕ. Ăна нумай хутчен ЧР тата РФ Вĕрентÿ министерствисен Хисеп грамотисемпе наградăланă.
М. ВАСИЛЬЕВ.