07 октября 2013 г.
Тамара Аркадьевна Молчанова Хирпуç шкулĕнче 1952 – 1990 çулсенче ĕçленĕ, биологи, хими, географи вĕрентнĕ. Директор заместителĕнче 20 çул ытла вĕрентÿпе воспитание йĕркелесе пынă. Сакăр вун тăваттă тултарать пулин те Тамара Аркадьевна пурнăç çине хавхалануллă чунĕпе, çивĕч куçĕпе пăхать. Унăн тăван пиччĕшĕн хĕрĕ Молчанова (упăшкипе Иванова) Эльвира Анатольевна 1974 çулта пединститут пĕтернĕ. Тăватă çул Çĕрпелти вăтам шкулта акăлчан чĕлхи вĕрентнĕ. Мăшăрланнă хыççăн çав ĕçпех Лаптевсен тинĕсĕ хĕрринчи Кулар, Тикси текен вырăнсенче 19 çул ĕçленĕ. Вăрнарти лицейра тата 1-мĕш шкулта акăлчан чĕлхи вĕрентнĕ. Канура пулсан та пушă вăхăтра чылай вĕренекене акăлчан чĕлхипе ĕлкĕрсе пыма, экзаменсене хатĕрленме консультацисемпе пулăшать. Эльвира Анатольевнăн хĕрĕ Наталья Николаевна Самарина та амăшĕн çулĕпе кайнă. 2000 çултанпа Вăрнарти 1-мĕш шкулта акăлчан чĕлхи вĕрентет.
Калас пулать, Эльвира Анатольевнăн амăшĕ те, Клавдия Николаевна Молчанова (хĕр чухне Можаева), учитель пулнă, педучилище пĕтернĕ, фронта кайиччен Елчĕк районĕнчи Эптемешри шкулта кĕçĕн классене вĕрентнĕ. Вăрçă хыççăн совпартшкултан партипе Совет ĕçне куçнă. Пана Васильевна Молчанова (Тамара Аркадьевнан иккĕмĕш сыпăкри пиччĕшĕн арăмĕ) нумай çул хушши Вăрнарти вăтам шкулта вырăс чĕлхипе литературине вĕрентнĕ.
Надежда Семеновна Цветкова (хĕр чухне Молчанова) – Тамара Аркадьевнăн 2-мĕш сыпăкри аппăшĕ – Вăрнарти вăтам шкулта хими вĕрентнĕ.
Нонна Ивановна Александрова нумай çул хушши Вăрнарти 1-мĕш шкулта математика вĕрентрĕ (Тамара Аркадьевнан 2-мĕш сыпăкри аппăшĕ). Вăл вилнĕренпе çулталăк çитет.
Фаина Петровна Молчанова (Тамара Аркадьевнан 3-мĕш сыпăкри йăмăкĕ) 40 çула яхăн Канашри педагогика училищинче музыка вĕрентнĕ. Ун çинчен хаçатсенче статьясем те пичетленнĕ. Халĕ вăл пенсире.
Тамара Аркадьевнапа Эльвира Анатольевна пулăшнипе эпир çапла Молчановсен педагогика династине палăртрăмăр. Тавтапуç хастар педагогсене, Вĕрентекен кунĕ ячĕпе хĕрÿ салам!
И.ФЕОФАНОВА.