30 сентября 2013 г.
Вăрман Кипекри Юлия Евграфовна Петрова ку тăрăхри канури хĕрарăмсене клуба йыхравланă, вĕсене ал ĕçне явăçтарма шутланă. Темиçен хăйсем мĕн маçтăрлама пултарнине ăнлантарса кăтартнă. Пуçа çыхмалли виç кĕтеслĕ тутăрсем эрешлесе çыхнă, тĕрленĕ, чĕнтĕрленĕ. Каçсерен пĕр-пĕринпе калаçса, хăйсен ĕмĕчĕсемпе паллаштарнă, ĕçленĕ вăхăтра юрлакаласа илнĕ.
– Çыхас, тĕрлес ĕç лайăх-ха, – тенĕ вĕсем. – Çапах та кăшт тем çитмен пек туйăнать. Атьăр, фольклор ушкăнĕ йĕркелер.
Малтанах çак ушкăна тăваттăн-пиллĕкĕн çÿренĕ. Халь унта çирĕме яхăн пенсионер. Ватă арçынсем те хутшăнасшăн. Вĕсене клуб ĕçне ертсе пыракан Лидия Михайлова хавхалантарать. Пултаруллă эртелĕн репертуарĕнче чăвашсен авалхи, хальхи юрри-ташши паллă вырăнта. Концертсем Уйкас Кипек клубĕнче кăна мар, кÿршĕллĕ ялсенче те иртеççĕ. Вăрнарпа Красноармейски районĕсенче темиçе хутчен те пулчĕç.
– Çуллахи канăçсăр кунсем иртсен ĕçе малалла вăйлатăпăр, – теççĕ ялти артистсем. – Пирĕн ушкăна хутшăнас текенсем тупăнсах пыраççĕ. Ырă та урă пурнăç йĕркине аталантарса сарни хăех мĕне тăрать.
Юлия Евграфовна – Кипек таврашĕнчи ятлă-сумлă, пысăк авторитетлă çын. Çур ĕмĕр ачасене шкулта пархатарлăха вĕрентрĕ. Сакăр вуннăра та халăхран уйрăм пурăнаймасть – ялан çын хушшинче.
Вениамин
ИВАНОВ.