25 сентября 2013 г.
Вăрнар район администрацийĕн пуçлăхĕн Леонид Николаевăн сентябрĕн 13-мĕшĕнчи йышăнăвĕпе килĕшÿллĕн, саккунсăр упранакан хĕç-пăшала, çар хатĕрĕсене тата сирпĕнекен япаласене хăй ирĕкĕпе тавăрса паракан граждансене укçан хавхалантармалли йĕркене çирĕплетнĕ. Унта хавхалантару тÿлевĕсен виçисене уйрăммăн палăртса хăварнă.
Йышăнура çырнипе килĕшÿллĕн, тÿлеве хĕç-пăшалпа çар хатĕрĕсене тата сирпĕнекен япаласене хăй тĕллĕн Раççей Шалти ĕçсен министерствин муниципалитетсем хушшинчи «Вурнарский» пайне килсе паракансем тивĕçеççĕ. Шалти ĕçсен пайĕн комиссийĕ ку тĕслĕхсене пăхса тухнă хыççăн вунă кун хушшинче гражданинăн укçан хавхалантарма ыйтса çырнă заявленине тата ытти документсене район администрацине ярса парать. Укçана гражданина унăн банкри счечĕ çине куçарса параççĕ. Çак тĕллевпе район бюджетĕнче тăкаксен пайне кĕртсе хăварнă.
Саккунсăр упранакан хĕç-пăшала, çар хатĕрĕсене тата сирпĕнекен япаласене тавăрса панăшăн хавхалантармалли тÿлевсен виçисем:
Тикĕс кĕпçеллĕ сунар пăшалĕ – 1 шт. – 1000 тенкĕ.
Нарезкăллă кĕпçеллĕ сунар пăшалĕ – 1 шт. – 1500 тенкĕ.
Çар хĕç-пăшалĕ – 1 шт. – 3000 тенкĕ.
Перекен харпăр хăй тунă хатĕр, обрез – 1 шт. – 1000 тенкĕ.
Граната, мина, снаряд – 1 шт. – 3000 тенкĕ.
Сирпĕтмелли япаласем (тротил, аммонит т.ыт.те) – 100 гр. – 500 тенкĕ.
Çар хатĕрĕсем – 1 шт. – 10 тенкĕ.
Сирпĕтмелли хатĕрсем (детонаторсем т.ыт.те) – 1 штŸ1 м – 800 тенкĕ.
Хÿтĕленме усă куракан газ хĕç-пăшалĕ – 1 шт. – 500 тенкĕ.