Редакция Вурнарской районной газеты «Путь победы»ОФИЦИАЛЬНЫЙ САЙТ
Орфографическая ошибка в тексте

Послать сообщение об ошибке автору?
Ваш браузер останется на той же странице.

Комментарий для автора (необязательно):

Спасибо! Ваше сообщение будет направленно администратору сайта, для его дальнейшей проверки и при необходимости, внесения изменений в материалы сайта.

Публикации » Спорт юхăмĕн хастарĕсем

23 сентября 2013 г.

Виçĕ Çавал çыравçисен Шупашкарти пухăвĕнче (кăçалхи мартăн 26-мĕшĕ) çынсем пуçтарăнса çитнĕ тĕле пăхаттирле кĕрнеклĕ арçын тухса тăчĕ.

– Эсир, – терĕ, – Вăрнар енĕн чун хавалне, илемлĕхне çĕклетĕр, эпир вара, спорт юхăмĕн хастарĕсем, вăй хаваллă ăру ÿстересшĕн, Вăрнар тăрăхĕн сывлăхлă, хăватлă ĕçченĕсем районшăн çĕнĕрен çĕнĕ çитĕнÿсем тума пултарччăр, тĕрлĕ енлĕн аталанччăр.

Паллашрăмăр: Олег Васильев. «Гвардеец» (Элмен) ЧРСОО правленийĕн председателĕ. Спортăн Чăваш Республикинчи общество организацине çак ятпа Олег Витальевич 2011 çулхи февралĕн 7-мĕшĕнче чăмăртанă. Унтанпа, икĕ çулта, массăллă мероприятисем пайтах ирттернĕ. Республика анлăшĕнче те, Нурăспа Вăрнар таврашĕнче те. Вăй-хал вăййин ăмăртăвĕсем, Олег хакланă тăрăх, çамрăксене интерессене кура пĕрлештереççĕ, тăван шкулпа, ялпа, аслă ăру çыннисемпе çывăхлатаççĕ. Патриотсем шăпах çавнашкал лару-тăрура çитĕнеççĕ. Уйрăмăнах юбилейлă массăллă мероприятисене палăртмалла. Физкультурăпа спорта килĕштернĕ ачасем вĕренÿре те пултаруллă ĕлкĕрсе пыраççĕ.

Кăçалхи Çĕнтерÿ кунĕнче çăмăл атлетсен чупуне (кросне) вун пилĕк çĕрте йĕркеленĕ. Волейбол, футбол, баскетбол ăмăртăвĕсем пулнă. Кире пуканĕ йăтакансем, пулăçсем тупăшнă. «Наркотике хирĕç!», «Таса-сывă пурнăçшăн!» акцисем иртнĕ. Старта нумай хутчен спорт ветеранĕсем, çамрăксем, шкул ачисем, вĕсен ашшĕ-амăшсем, учительсем пĕрле тухнă. Ял кунĕн уявĕ йăлана кĕрсе пырать. Унта боксерсене, кĕрешекенсене курма пулать. Халь тата велоспорт аталанать. Йĕлтĕр çине тăракансем йышлăрах та йышлăрах.

Олег Витальевич шкулта малтан Шупашкарта вĕреннĕ. Анчах тăван шкулĕ вырăнĕнче уншăн Ярмушкари çывăхарах (1972 – 1981 ç.ç.). Вăл «Гвардеец» колхоз çыннисене лайăх пĕлнĕ, вĕсемпе халĕ те тăтăш тĕл пулса хутшăнать. Ярмушка тăрăхĕнче спорт уявĕсем час-часах иртеççĕ. О.Васильев хăй – пуриншĕн те ăмсанмалли тĕслĕх. Çарти çулĕсенче Тинĕс-Çар флотĕнче тăнă (1994 – 1996), Раççей ВМФ чемпионачĕн призерĕ, кĕрешÿ енĕпе спорт мастерĕн кандидачĕ, ирĕклĕн çапăçса 1-мĕш разряд нормине тивĕçтернĕ. 2001 – 2005 çулсенче Чăваш патшалăх педуниверситетĕнче физкультура факультетĕнче вĕреннĕ. «Виват» ООО директорĕн заместителĕ. Юлташĕсем, пулăшуçисем – хăй пекех хăватлă çынсем. Çав шутра шкул, ял, хула, ĕç, вĕренÿ, вĕрентÿ пĕрлештернисем – Н.П.Федоров, Л.П.Яковлева (иккĕшĕ те Пуканкассинчен), ыттисем. Николай Павлович – бокс спорчĕн мастерĕ, сакăр хутчен Мускав хулин чемпионĕ, Лихачев ячĕпе хисепленекен призсемшĕн çапăçса нумай хутчен пĕтĕм тĕнчери ăмăртусенче çĕнтернĕ. Ярмушка шкулĕнче вĕреннĕ, физкультурăпа спортăн Раççей патшалăх университетне пĕтернĕ. Çĕнтерÿ кунĕнчи ăмăртусене йĕркелекенĕсенчен пĕри пулнă. Линда Павловна – СССР спорт мастерĕ (самбо, дзюдо). Нумай хутчен тĕнче, Европа, Раççей, Чăваш ен чемпионĕн ятне тивĕçнĕ (1989 – 2009 ç.ç.). Вăтам шкула Ярмушкара, университетсене (строительство тата физкультура факультечĕсем) Шупашкарта пĕтернĕ. 1993 çултанпа ачасен В.С.Соколов ячĕпе хисепленекен спорт шкулĕнче дзюдо енĕпе тренер-преподаватель.

– Пирĕн хыççăнхисем пирĕнтен пултаруллăрах пулччăр, – тет спортăн районти мухтавлă ветеранĕ Аркадий Иванович Смирнов. Кăçал хăй Шупашкар – Етĕрне – Шупашкар трассăра велосипедпа, Апаш – Шупашкар çулĕ çинче çăмăл атлетика енĕпе ăмăртса çĕнтернĕренпе 60 тата 50 çул çитнине аса илтерчĕ. Çак уйăхра (30-мĕшĕнче) çуралнăранпа 78 çул çитнине паллă тăвать. Иртнĕ ĕмĕрти 1960-мĕшĕнчен хĕрĕх çул хушши мĕн пенсие тухичченех Кĕçĕн Кипекри вăтам шкулта ĕçлерĕ. Аслă пĕлÿллĕ физкультура преподавателĕсенчен – районти пĕрремĕшĕ. Етĕрнере педучилище, Волгоградра пединститут пĕтернĕ. Совет Çарĕн службинче чухне Аркадий Смирнов авиамеханик курсантсене самолетпа вĕçме хатĕрленĕ вăхăтра механик-вооружейнике вилĕмрен çăлса хăварнă. Çавăншăн унăн ятне ĕмĕрлĕхе 23282 номерлĕ çар чаçĕн Хисеп кĕнекине кĕртнĕ.

Пĕр-икĕ çула яхăн Аркадий Иванович Уравăшри вăтам шкулта тăрăшнă. Хăйпе пĕрле ачасене гимнастикăна хăнăхтарнă, чупма, сикме, йĕлтĕрпе ярăнма вĕрентнĕ. Чылай ăмăртусенче хăй çĕнтерÿçĕ пулнă (1956 çулта Байкал леш енчи Çар округĕн призерĕ – йĕлтĕрпе 30 километра чупнă), 1958-мĕшĕнче Киев Çар округĕн призерĕ (10 километра чупнă), 1990-мĕшĕнче ЧР профсоюз обкомĕн первенствин призерĕ (кросри 2-мĕш вырăн). Талантлă учитель 25 ачана СССР спорт мастерĕ таран ÿсме хатĕрленĕ. Çав шутра Олимп вăййисене хутшăннисем те пулнă. А.Смирнов воспитанникĕсем халĕ аллăн ытла çĕршывăн тĕрлĕ енĕнче ачасене физкультура вĕрентеççĕ.

Ăна, аслă категориллĕ профессионала, ЧР тава тивĕçлĕ учителĕ ятпа чысланă. Вăл халăх çут ĕç отличникĕ (1968), РСФСР спорт ветеранĕ (1987). «Хастар ĕçшĕн» медалĕ пур (1970). Виç утăмри тăван шкула кĕрсе тухмасăр чăтса лараймасть, ачасемпе уявсенче кăна мар курнăçса калаçать.

М.ВАСИЛЬЕВ.

Мой МирВКонтактеОдноклассники
Система управления контентом
TopList Сводная статистика портала Яндекс.Метрика